बाँके । सशस्त्र प्रहरी बल नेपाल नं. ३० गण मुख्यालय बागेश्वरी बाँकेका प्रमुख सशस्त्र प्रहरी उपरीक्षक (एसपी) भीमबहादुर चन्दको सक्रियतासँगै जिल्लामा तस्करी नियन्त्रणमा कडाइ गरिएको छ। सीमावर्ती क्षेत्रमा निगरानी बढाइँदै नियमित गस्ती र चेकजाँचलाई तीव्र बनाइएको सशस्त्र प्रहरीले जनाएको छ।
यसै क्रममा चैत १ गते नं. ३० गण मुख्यालय बागेश्वरी बाँके तथा मातहत इकाइबाट खटिएको सशस्त्र प्रहरी टोलीले भारतबाट अवैध रूपमा नेपालतर्फ ल्याइँदै गरेको अन्दाजी ८ लाख ५३ हजार ३५ रुपैयाँ बराबरका विभिन्न सामग्री बरामद गरेको हो।
बरामद गरिएका सामग्री आवश्यक कारबाहीका लागि नेपालगञ्ज भन्सार कार्यालय जमुनाहा, बाँकेमा बुझाइएको सशस्त्र प्रहरीले जनाएको छ।
सीमामा निगरानी कडा बनाइएपछि तस्करीमा संलग्न व्यक्तिहरूमा त्रास बढेको र अवैध गतिविधि नियन्त्रणतर्फ उन्मुख भएको स्थानीयको भनाइ छ।
