(महेन्द्र सिंह)
बाँके । निजी क्षेत्रको तारा एयरलाइन्सले नेपालगंजबाट हुम्लाका लागि सहुलियत उडान सुरु गरेको छ । सर्वसाधारणलाई मध्य नजर राखि उक्त एयरलाइन्सले सहुलियत उडान सुरु गरेको हो ।
हुम्लाका न्यून आयश्रोत भएका स्थानीयलाई मध्यनजर राखि सहुलियत उडान नेपालगंजबाट सिमकोटका लागि भर्न सुरु गरेको तारा एयर सिमकोटका सहइनचार्ज नुर्वु लामाले बताउनुभयो । कोरोना कहर पछि हुम्लामा सञ्चालनमा आएका एयरलाईन्स मध्य सहुलियत उडान भर्ने तारा एयर पहिलो भएको छ ।
अब सहुलियत उडान प्रत्येक बुधवार हुनेछ । यसका लागि भाडादर प्रतियात्रु पाँच हजार ४६५ निर्धारण गरिएको एयरलाईन्सले जनाएको छ । जब कि चार्टर उडानमा निजी एयरलाइन्सहरुले प्रति यात्रु नेपालगंजबाट सिमकोटसम्म दश हजार पाँच सय रुपियाँ लिने गर्छन् । तारा एयरले हुम्लाका लागि सहुलियत उडान सुरु गरेसँगै अन्य सीता तथा समिट एयरलाई पनि उक्त उडान भर्न दवाब सृजना हुने स्थानीय छक्क बहादुर रोकायाले बताउनुभयो ।रासस
