(ABC-Sanchar)
बाँके । अक्सिजनको कृत्रिम अभाव हुन थाले पछी बाँकेको नेपालगन्जमा उत्पादीत अक्सिजन लुम्बिनी प्रदेशका विभिन्न जिल्लामा मात्रै नभई कर्णाली र सुदुरपश्चिम प्रदेशसँगै भारतका विभिन्न शहरमा ढुवानी भइरहेको छ ।
तर बाँकेमा केही अक्सिजन व्यवसायी जनप्रतिनिधी, मेडिकल माफियाको संलग्नतामा कालोबजारी बढिरहेको छ । जिल्ला प्रशासन बाँके भने कानमा तेल हालेर बसिरहेको छ ।
कोरोना भाइरस संक्रमितलाई अक्सिजनको चर्को अभाव देखाउादै कोहलपुर मेडिकल कलेज र भेरी अस्पतालले कोरोनाका थप विरामी राख्न नसक्ने बताउँदै आएका छन । बाँकेमा माफियाको गिरोहले भने यसको कालोबजारी गर्न थालेको छ ।
खुला सीमाका कारण सीमा क्षेत्रबाट ठूलो परिमाणमा सिलिन्डर भारत चोरीनिकासी हुँदा बाँकेमा अभाव देखाइएको हो । कतिपय पहुँचधारीले आफूखुसी उद्योग परिसरबाटै अक्सिजन सिलिन्डर बोकेर लैजाँदा अस्पतालमा संक्रमितलाई उपचार गर्न समस्या परेको छ ।
केही उद्योग र बिक्रेताले अस्पतालभन्दा सर्वसाधारणलाई महँगो मूल्यमा सिलिन्डर बिक्री गरेका छन् । यस्ता सिलिन्डर संगठित समूहले सीमा र अन्य क्षेत्रमा कालोबजारी गर्दै आएका छन् ।
बजार र अस्पतालमा अक्सिजन अभाव हुन थालेपछि बाँकेका उद्योग परिसरमै सर्वसाधारणदेखि कालोबजारी गर्ने समूहको भीड लाग्न थालेको छ ।
परस्पुरमा रहेको अक्सिजन उद्योगमा बाँकेका भन्दा पनि बाहिर जिल्ला र भारत जाने अक्सिजनका लागि गाडी लाइनमा बसिरहेको भेटिएका छन ।
बाँकेमा पुग्दो मात्रामा अक्सिजन रहे पनि माग बढिरहेको छ । यहाँका स्वास्थ्यकर्मीहरुले बाँकेमा अक्सिजन अभाव हुने आँकलन गर्दै यहाँका व्यवसायीलाई भारततर्फ निकासी नगर्न आग्रह गरिरहेका छन् ।
कोभिडका सिकिस्त बिरामीलाई अक्सिजन चाहिने देखिएकाले बजारमा माग बढेसँगै तस्करी पनि मौलाउन थाले पनि स्थानीय प्रशासन मौन छ ।
नेपालगन्ज उपमहानगरपालिका १७ को परसपुरमा रहेको एचओ अक्सिजन इन्डष्ट्रिज प्रालिबाट दिनहुँ उत्तर प्रदेश सरकारले नेपालगन्जका व्यवसायी मार्फत भारतमा रहेका आफ्ना बिरामी बचाउन अक्सिजन लैजाने गरेको जनाएको छ ।
नेपालगन्जबाट अक्सिजन भारत जान थालेपछि यस क्षेत्रमा अक्सिजनको थप समस्या उत्पन्न हुन थालेको छ । यो समस्याको समाधान बाँके प्रशासनले चाँडै गरेन भने ठुलै समस्या नआउला भन्न सकिदैन।
