(केभी निश्चल)
दाङ । सल्यानको कालिमाटी गाउँपालिका २ को बाटुले गाउँमा आतंक मच्चाउने पाटे बाघ नियन्त्रणमा लिइएको छ । प्रहरी, सेना र डिभिजन वन कार्यालयको टोलीले बाघलाई बुधबार बिहान नियन्त्रणमा लिएको हो ।
कालिमाटी गाउँपालिका–२ बाटले गाउँका तुल्सीकुमारी घर्तीको गोठमा बाँधेको गोरु मारेपछि स्थानीयले प्रहरीलाई खबर गरेका थिए । बिहान ६ बजेतिर उक्त बाघले गोठमा बाँधको दुईवटा गोरु मारेको थियो भने एउटा गोरुलाई घाइते बनाएको थियो ।
जिल्ला प्रहरी कार्यालय सल्यानले बाघ नियन्त्रणका लागि बर्दिया राष्ट्रिय निकुञ्ज सुरक्षार्थ देवीदत्त गणको नेपाली सेना र प्राविधिकको टोली सल्यानमा पुगेको थियो । सो टोलीले गोठदेखि दुई सय मिटर पश्चिममा रहेको बाँसघारीमा बसिरहेको अबस्थामा बाघ नियन्त्रणमा लिइएको हो । नियन्त्रणमा लिइएको बाघ बुधबार नै बाँके राष्ट्रिय निकुञ्जमा पठाइएको छ ।
