(ABC-Sanchar) काठमाडौँ । प्रधानमन्त्री पुष्पकमल दाहाल ‘प्रचण्ड’, नेपाली काँग्रेसका सभापति शेरबहादुर देउवा र नेकपा (एमाले)का अध्यक्ष केपी शर्मा ओलीबीच भएको छलफल सकिएको छ।
प्रधानमन्त्री कार्यालय सिंहदरबारमा नेताहरूबीच झन्डै साढे एक घण्टा कुराकानी भएको काँग्रेस संसदीय दलका प्रमुख सचेतक रमेश लेखकले बताए ।
आजको भेटमा संसदीय समितिहरूको नेतृत्व, सत्य निरूपण तथा मेलमिलाप विधेयकलगायत विषयमा छलफल भएको लेखकले बताए ।
‘आजको भेटघाटको मूल विषय भनेको संसदभित्रकै विषयको हो। बजेटको तयारी भइरहेको छ। नीति तथा कार्यक्रम संसदमा प्रस्तुत हुने कुरा छ, विनियोजन विधेयकका कुरा आज सकिन्छ। त्यसपछि संसद्को काम अघि बढ्छ,’ लेखकले भने,‘यिनै केन्द्रित भयौँ।’
भुटानी शरणार्थी प्रकरणमा पूर्वगृहमन्त्री बालकृष्ण खाँणलगायत पक्राउ परेका बेला नेताहरूबीच भेटवार्ता भए पनि यस विषयमा आज छलफल नभएको उनको भनाई छ ।
