ABC (क्राईमबिट)
जनकपुरधाम । अख्तियार दुरुपयोग अनुसन्धान आयोगले घुस लिरहेको अवस्थामा जनकपुरधाम उपमहानगरपालिका ११को वडा अध्यक्ष र सचिवविरुद्ध विशेष अदालतमा मुद्दा दायर गरेको छ ।
गत चैत ८ गते उनीहरुलाई अख्तियारले स्टिङ्ग अप्रेशन गरी जनकपुरधामको रोहन होटलबाट पक्राउ गरेका थिए ।
आयोगका प्रवक्ता भोला दाहालका अनुसार अनुसन्धानको क्रममा दुबैजनाले घुस लिएको पुष्टि भएकाेले शुक्रबार अदालतमा आरोपपत्र दायर गरिएको थियोे । मुद्दा दायर भएपछि वडाध्यक्ष निलम्बन भएको छ । जग्गा दर्ता कायम गर्ने सर्जमिन मुचुल्काको रोहबरमा दस्तखत गर्न सेवाग्राहीसँग उनले घुस रकम माग गरेका थिए । त्यसपछि सेवाग्रहीको उजुरी निवेदनका आधारमा बर्दिवास कार्यालयबाट खटेको टोलीले दुबैजनालाई सेवाग्राहीबाट ५० हजार घुस लिइसकेको अवस्थामा नियन्त्रणमा लिएको थियो ।
घुस/रिसवत माग गरी लिएको पुष्टि हुन आएकोले निजहरु अर्जुन कुमार चौधरी र माधव कुमार रायले भ्रष्टाचार निवारण ऐन, २०५९ को दफा ३ को उपदफा (१) को कसुर गरेको हुँदा निजहरुलाई बिगो पचास हजार रुपैयाँ कायम गरी भ्रष्टाचार निवारण ऐन, २०५९ को दफा ३ को उपदफा (१) देहाय (ख) बमोजिम कैद सजाय गरी सोही ऐनको दफा ३ को उपदफा (१) वमोजिम जरिवाना सजायसमेत हुन मागदाबी लिइ शुक्रबार बिशेष अदालत, काठमाडुमा आरोपपत्र दायर गरिएको छ,’अख्तियारले सार्वजनिक गरेको विज्ञप्तिमा लेखिएको छ ।
