(ABC-Sanchar)
काठमाडौं । नेकपा एमालेले आज पनि प्रतिनिधिसभा बैठक चलन नदिने तयारी गरेको छ । संघीय संसद भवन नयाँ बानेश्वरमा अपराह्न ४ बजे बैठक बस्दैछ । तर, पशुपतिको जलहरीबारे स्पष्ट कुरा सरकारले सदनलाई जानकारी नगराए आज पनि संसद चल्न नदिने एमाले संसदीय दलका प्रमुख सचेतक पदम गिरीले बताए ।
शुक्रबार बसेको बैठकमा माओवादीका सांसद लेखनाथ दाहालले पशुपतिको जलहरीमा तत्कालिन प्रधानमन्त्री एवम् एमाले अध्यक्ष केपी ओलीले भ्रष्टाचार गरेको आरोप लगाएका थिए । त्यसपछि एमालेका सांसदले त्यसको जवाफ माग्दै संसद अवरुद्ध पारेका थिए ।
एमालेको अवरोधपछि २० मिनेटका लागि बैठक स्थगित गरेर छलफल गरिएको थियो । तर, अबेरसम्म पनि सहमति जुट्न नसकेपछि बैठक आजका लागि सारिएको थियो । नेता गिरीले सत्ता पक्षका सांसदले कपोकल्पित र तथ्यहीन र पूर्वाग्रही ढंगले आरोप लगाएको भन्दै गल्ती स्वीकारेर सत्तापक्षले माफी नमागेसम्म संसद चल्न नदिने बताए ।
उनले भने, ‘सत्तापक्षका सांसदले लगाएको आरोप प्रमाणित गर्नुपर्छ । त्यो कुरामा सरकार जुन ढगले आउँछ, आजको संसद त्यही अनुसारले चल्छ । तथ्यहिन आरोप लगाएर उहाँहरु पन्छन सक्नुहुन्न । जुनजुन विषय आएका छन् ती विषयको निरोपण नभएसम्म बैठक अगाडि बढ्न सक्दैन ।
एमाले बजेट ढिला हुनुहुन्न भन्ने पक्षमा नै रहेको तर पशुपतिको जलहरी सुन हो कि पित्तल पहिले टुंगो लगाउनुपर्ने उनको भनाइ छ । आज सरकारले ल्याएको नीति तथा कार्यक्रममाथि सांसदहरूले उठाएका प्रश्नमा प्रधानमन्त्री पुष्पकमल दाहाल प्रचण्डले जवाफ दिने बैठकको कार्यसूची छ ।
शुक्रबार प्रमुख प्रतिपक्षी दल नेकपा एमालेले संसद अवरोध गरेका कारण प्रधानमन्त्रीले सदनमा जवाफ दिन पाएका थिएनन् ।
