(ABC-Sanchar)
जनकपुर । जनकपुरधाम उपमहानगरपालिका वडा नाे–२४ बसहियाकाे स्थानीयवासीहरु वडा अध्यक्ष उपेन्द्र सहनीमाथि कारबाहीको माग गरेका छन् । आइतबार बसहियाबाट निस्केको विरोध जुलुश जनकपुरधामको विभिन्न भागको परिक्रमा गर्दै जिल्ला प्रशासन कार्यालय अगाडि धर्ना प्रदर्शन गरेका थिए।
प्रदर्शनकारीहरुले सार्वजनिक जग्गामा जातीय अतिक्रमण गर्न पाइदैन, भ्रष्ट वडाध्यक्षलाई कारबाही गर, सामाजिक सदभाव कायम गरलगायतकाे मागसहितको प्लेकार्ड बोकेर प्रदर्शन गरेका थिए । गत बिहीबार बसहियाको जदुराउत पोखरीको डिलमा अवस्थित ऐलानी जग्गामा वडाध्यक्ष सहनीले सहनी धर्मशाला बनाउन खोज्दा स्थानीयवासीहरुले विरोध जनाएका थिए ।
उनीहरुले सार्वजनिक जग्गामा कुनै एक जातको जातीय कुट्टी नबनाइ सामुदायिक भवन नामकरण गर्नुपर्ने माग गर्दै वडाअध्यक्षलाई रोक्न खोज्दा दुई पक्षबीच विवाद भएको थियो । सो विवादको क्रममा वडाअध्यक्ष सहनीले गुण्डाहरु लगाएर स्थानीय सुनिल यादवलगायतका एक दर्जन भन्दा बढी व्यक्तिलाई कुटपिट गरेको स्थानीयवासीहरुले आरोप लगाएका छन् । घाइते सुनिल यादवले वडाध्यक्ष सहनीसहित प्रमोद सहनी, चन्दन सहनी, शिवरत्न सहनीलगायत दर्जनौं व्यक्तिले स्थानीय सुरुज यादव, अमीर्ती देवी, अजय राउतलगायतका करीब एक दर्जन व्यक्तिलाई निर्घात कुटपिट गरेको आरोप लगाए । घाइतेहरु मध्ये ३५ वर्षीय सुनिल यादवको अवस्था गम्भीर भएपछि उनलाई थप उपचारका लागि शनिबार साँझ प्रादेशिक अस्पताल जनकपुरधामबाट रेफर गरेर काठमाण्डु लागिएको थियोे । उनको उपचार काठमाण्डुमा भैरहेको रहेको छ ।
