ABC (क्राईमबिट)
काठमाडौं । नेपाल प्रहरीको सुदूरपश्चिम प्रदेशका प्रमुख डीआईजी भरत बोहराले घुमुवा अनुसन्धान समूह आर आइटी खारेज गरिदिएका छन् ।
डीआईजी बोहराले कञ्चनपुरको बेलौरीमा होटल सञ्चालक माथि आरआइटीमा कार्यरत प्रहरीले आक्रमण गरेको आरोप लागेपछि दरबन्दी फिर्ता गर्दै आरआइटी खारेज गरेका हुुन् ।
बोहराले दरबन्दी फिर्ता गर्दै प्रदेश अनुसन्धान समूहका प्रमुख वरिष्ठ प्रहरी नायब निरीक्षक केशवराज जोशीसहितका ७ जना प्रहरीलाई सम्बन्धित ठाउँमा रमाना गरेर पठाएका छन् । डीआईजी बोहराले आक्रमणको आरोप लागेका २ प्रहरीमाथि अनुसन्धान शुरु गरेको प्रहरी उच्च स्रोतले जनाएको छ ।
बेलौरी बजारमा रहेको फेमली रेष्टुरेष्टका सञ्चालक सुरेशकुमार वडायकमाथि शुुक्रबार राति धारिलो वस्तुले प्रहार गरेको आरोप लागेपछि सहायक हवलदार दीप पाण्डे र प्रहरी जवान हेमराज भट्टमाथि अनुसन्धान भइरहेको छ । पाण्डे र भट्टले गुण्डाशैलीमा हर्कत गरेको भनेर विरोध भइरहेको छ । उनीहरू दोषी पाइएमा डीआईजी बोहराले कडा कारबाही गर्ने चेतावनी दिएको स्रोतको भनाइ छ ।
प्रदेश प्रहरी कार्यालयका प्रवक्ता तथा एसएसपी प्रज्वल महर्जनले प्रदेश अनुसन्धान समूह आरआइटी खारेज गरिएको पत्रकारलाई प्रतिक्रिया दिएका छन् ।
