ABC (क्राईमबिट)
काठमाडौं । जातीय विभेदसम्बन्धी कसुरमा पक्राउ परेकी भगवती पाण्डे शीतललाई प्रहरीले छाडेको छ । काठमाडौं जिल्ला अदालतले अधिवक्ता पाण्डेलाई हिरासतमा राख्न नपर्ने भनेपछि प्रहरीले हिजो राति नै पाण्डेलाई छाडेको हो ।
प्रहरीले पाण्डेलाई हिजै म्याद थपका लागि काठमाडौं जिल्ला अदालत उपस्थित गराएको थियो । तर उनलाई हिरासतमा राखेर अनुसन्धान गर्न नपर्ने भन्दै अदालतले म्याद थप नगरेपछि छाडिएको जिल्ला प्रहरी परिसर काठमाडौंका प्रहरी उपरीक्षक (एसपी) कुमुध ढुंगेलले जानकारी दिए ।
एसपी ढुंगेलका अनुसार पाण्डेविरूद्ध जाहेरी अनुसारकै मुद्दा चल्नेछ । अब उनले हिरासत बाहिरै बसेर मुद्दा लड्नेछिन् ।
पाण्डेले एक टेलिभिजन अन्तर्वार्तामा मुस्लिम, मगर, तामाङ लगायत समुदायमा दाजुबहिनीबीच विवाह हुने विवादास्पद अभिव्यक्ति दिएका थिए ।
त्यसपछि उनीविरूद्ध परिसरमा जाहेरी परेपछि साउन १२ गते जिल्ला प्रहरी परिसरले काठमाडौं जिल्ला अदालतबाट पक्राउ पुर्जी लिएको थियो। त्यसपछि फरार रहेका उनी बुधबार पक्राउ परेका थिए ।
