(ABC-Sanchar)
दाङ । घोराही लमही सकडखण्ड अन्र्तगत पर्ने कुलमोहर नजिकै सोमबार बिहान देखि खसेको पहिरोले सडक अवरुद्ध भएको थियो ।
उक्त सडकमा खसेको पहिरो पन्छाएर एकतर्फी रुपमा सडक संचालनमा ल्याएको जिल्ला प्रहरी कार्यालय दाङका प्रवक्ता तथा प्रहरी नायब उपरीक्षक राजन गौतमले जानकारी दिए ।
”माथिदेखि खसेको पहिराले सडक अवरुद्ध भएको थियो । सोमबार विहान देखि पहिरो खसेको हो । दुई वटा जेसिबीले पहिरो पन्छाइरहेको छ ।
अहिलेसम्म पनि माथिबाट लेडो खालको माटो खसेकोले पहिरो पन्छाउने काम जारी रहेको छ । कुलमोहर नजिकै ठूलो पहिरो खसेर सडक पूर्णरूपले अवरुद्ध भएको थियो । ठूलो वर्षा भएको हुँदा विहान खसेको पहिरोलाई पन्छाएर दुई तर्फी रुपमा सडक खुलाउने प्रयास जारी छ । पहिराले सडकमा क्षति पुर्याएको छ,” डिएसपी गौतमले भने ।
वर्षा भैरहेकोले अन्य स्थानमा पनि पहिरो जानसक्ने जोखिम रहेको भन्दै यात्रा गर्दा सावधानी अपनाएर मात्रै यात्रा गर्न प्रहरीले अनुरोध गरेको छ ।
