(एबिसि संचार ) तस्करीको करिब आधा केजी सुन बरामद गरी बाँडफाँड लुकाएको आरोप लागेका नेपाल प्रहरीका इन्सपेक्टरसहित चार जना प्रहरीले अदालतबाट भ्रष्टाचार मुद्दामा सफाइ पाएका छन् । साढे तीन वर्षअघि अख्तियार दुरुपयोग अनुसन्धान आयोगले दायर गरेको मुद्दामा सोमबार फैसला सुनाउँदै बिशेष अदालतले सफाइ दिएको हो ।
रसुवाको सीमा प्रहरी चौकी टिमुरेका इन्सपेक्टर खेमप्रसाद नेपाल, हवल्दार रामकाजी लामा, पुरुषोत्तम खत्री र रामशरण रिमालविरुद्ध राजश्व चुहावटको मुद्दा दायर भएको थियो । ६ लाख ७७ हजार रुपैयाँ बराबरको सुन उनीहरुले बाँडेर लिएको अभियोग थियो। जसमा अख्तियारले १२ असार २०७७ मा मुद्दा दायर गरेको थियो । सुन भने बरामद भएको थिएन ।
जसमा प्रतिकुल बयान गरेको आधारमा कल्याणी सुवेदीविरुद्ध समेत गत असोजमा मुद्दा दायर भएको थियो । सुवेदीले समेत सफाई पाएकी छिन् ।
रसुवा नाकाबाट तस्करी भएको सुन टिमुरे चौकीले बरामद गरेकोमा प्रहरीले नै लुकाएको भन्दै छानबिन भएको थियो । सुन धनीकै उजुरीका आधारमा छानबिन भएको थियो । अनुसन्धानका क्रममा सुरुमा अख्तियारले इन्सपेक्टर नेपालसहित १६ जनालाई निलम्बन गरी अनुसन्धान गरेको थियो । जसमा चार जनाको संलग्नता देखिएपछि मुद्दा दायर भएको थियो । पीडित महिलाले नै अदालतमा फरक बयान दिएपछि उनीहरुले सफाइ पाएका हुन् ।
