(एबिसि संचार ) पाल्पाको झुम्साखोलामा खानेपानी पाइपका लागि निर्माण गरिएको फलामे पुल भाँचिएर शनिवार दुईजना कामदार घाइते भएका छन् । फलामबाट बनेको पुलको तल्लो भागमा राखेको टेका हटाउन नट बोल्ट खोल्ने क्रममा एक्कासी पुल भाँचिएर तिनाउ गाउँपालिका–४, कोलडाँडाका ३९ वर्षीय रनबहादुर गाहा र रौतहटको चन्द्रनिगाहपुर घर भएका २२ वर्षको लक्षु माझी घाइते भएका हुन् । गाहाका दुवै खुट्टा भाँचिएको र माझीको खुट्टामा चोट लागेको प्रहरी चौकी, दोभान पाल्पाका प्रमुख पृथ्वी काफ्लेले जानकारी दिए । घाइते दुवैको उपचारका लागि बुटवलस्थित लुम्बिनी प्रदेशिक अस्पताल ल्याइएको छ ।
