(एबिसि संचार )
उपप्रधानमन्त्री तथा रक्षामन्त्री पूर्णबहादुर खड्कासँग संयुक्त राष्ट्रसंघकी अन्डर सेक्रेटरी जनरल एण्ड द यूएन हाइ रिप्रिजेन्टेटिभ फर डिसआरमेन्ट अफेयर्स इजुमी नाकामित्सुलेले सिंहदरबारमा भेट गरेकी छन्।
भेटमा उपप्रधानमन्त्री खड्काले नाकामित्सुलाई स्वागत गर्दै संयुक्त राष्ट्रसंघबाट भएको निरन्तर सहयोगका लागि धन्यवाद व्यक्त गरे।
सो अवसरमा उपप्रधानमन्त्री तथा रक्षामन्त्री खड्काले नेपाल र संयुक्त राष्ट्रसंघबीच ज्यादै घनिष्ठ सम्बन्ध रहेको, नेपालले संयुक्त राष्ट्रसंघको सदस्यता प्राप्त गरेदेखि नै संयुक्त राष्ट्रसंघको कार्यक्रमहरूमा सहभागी हुँदै आएको र संयुक्त राष्ट्रसंघको वडापत्र एवं जिम्मेवारीप्रति प्रतिवद्ध रहेको उल्लेख गरे।
विश्व शान्ति कायम गर्ने संयुक्त राष्ट्रसंघको उद्देश्य प्राप्तिमा नेपाल सक्रियतापूर्वक लागि रहेको र यसै सन्दर्भमा विश्वका १२ राष्ट्रका १३ वटा मिसनमा छ हजारभन्दा बढी शान्ति सैनिक परिचालन गरी महत्वपूर्ण भूमिका निर्वाह गरिरहेको कुरा रक्षामन्त्री खड्काले उल्लेख गरे।
साथै, नेपालले लैङ्गिक हिंसा तथा यौन दुर्व्यवहारमा शून्य सहनशीलताको नीति लिएको समेत उनले बताए।
उक्त अवसरमा उनले नेपाल सधैं नि:शस्त्रीकरणको पक्षमा रहेको र त्यसका लागि संयुक्त राष्ट्र संघले अघि बढाएका अधिकांश उपकरणप्रति नेपाल प्रतिवद्ध रहेको बताए। साथै उनले शान्ति तथा निशस्त्रीकरणसम्बन्धी काठमाडौंमा रहेको क्षेत्रीय केन्द्रलाई क्रियाशील बनाउन र काठमाडौं प्रोसेसमार्फत् क्षेत्रीय शान्ति प्रवर्द्धनमा अगाडि बढ्नु पर्नेमा जोड दिए।
सो अवसरमा संयुक्त राष्ट्रसंघका नाकामित्सुले नेपाल संयुक्त राष्ट्रसंघीय शान्ति प्रवर्द्धनसम्बन्धी कार्यक्रमका लागि उपयुक्त स्थान भएको कुरामा जोड दिँदै संयुक्त राष्ट्रसंघले विश्व शान्ति एवं नि:शस्त्रीकरणमा नेपालसँग मिलेर थप कार्य गर्न चाहेको कुरा उल्लेख गरिन्।
