बारा । जिल्ला प्रहरी कार्यालय बाराको निर्देशनमा इलाका प्रहरी कार्यालय सिम्रौनगढ र इलाका प्रहरी कार्यालय बारागढीबाट खटिएको प्रहरी टोलीले माघ २० र २१ गते १० वटा अवैध मदिरा भट्टी नष्ट गरेको हो ।
कारबाहीमा करिब तिन लाख रुपैयाँ बराबरको कच्चा पदार्थ र तयारी मदिरा नष्ट गरिएको बारा प्रहरीले दाबी गरेको छ ।
इलाका प्रहरी कार्यालय सिम्रौनगढको टोलीले सिम्रौनगढ नगरपालिका ५ सानो इटवालमा सञ्चालित तिन वटा अवैध भट्टीमा छापा हानी नष्ट गरेको हो ।
सो क्रममा एक हजार तिन सय ५० लिटर कच्चा पदार्थ (अनुमानित मूल्य एक लाख ५० हजार रुपैयाँ), १० लिटर तयारी मदिरा र रक्सी बनाउन प्रयोग हुने ६ वटा ड्रम नष्ट गरिएको बारा प्रहरीले जनाएको छ ।
त्यस्तै, इलाका प्रहरी कार्यालय बारा गढीबाट खटिएको टोलीले बारागढी गाउँपालिकाको विभिन्न वडामा कारबाही गरेको छ । वडा नम्बर २ मा तिन वटा, वडा नम्बर ३ मा एउटा र वडा नम्बर ६ मा तिन वटा गरी जम्मा सात वटा भट्टी नष्ट गरिएको छ ।
सो क्रममा दुई हजार पाँच सय लिटर कच्चा पदार्थ (अनुमानित मूल्य १ लाख ५० हजार रुपैयाँ), एक हजार पाँच सय लिटर तयारी मदिरा (अनुमानित मूल्य १ लाख ५० हजार रुपैयाँ) र रक्सी बनाउन प्रयोग हुने ७ वटा ड्रम नष्ट गरिएको प्रहरीले जनाएको छ ।
जिल्ला प्रहरी कार्यालय बाराले अवैध मदिरा उत्पादन र बिक्रीविरुद्ध कडा नीति अपनाएको बताएको छ । कारबाहीले स्थानीय स्तरमा अवैध मदिराको उत्पादन र वितरणमा कमी आउने अपेक्षा गरिएको छ । प्रहरीले यस्ता गतिविधिमा संलग्न व्यक्तिहरूमाथि निगरानी बढाउने र थप कारबाही गर्ने चेतावनी दिएको छ ।
