बारा । जिल्ला प्रहरी कार्यालय बाराको क्राईम शाखाका घुमुवा प्रहरी जवान चन्दन यादव र मोबाइल सिक्स टोलीका कमान्डर प्रहरी सहायक निरीक्षक असई महम्मद देवानको असुली धन्दा तीब्र भएको हो ।
घुमुवा प्रहरी जवान यादवले जिल्लाभरी र असई हुसेन कलैया क्षेत्रका साथै बरियारपुरका केही व्यापारीसंग महिनावारी रकम असुलीरहेको प्रहरी स्रोतले दाबी गरेको छ ।
यादव र हुसेनले होली खर्चको नाममा समेत रकम उठाईरहेको स्रोतको दाबी छ ।
क्राईम शाखाका जवान यादवले मटिअर्वा नाका, दक्षिण झिटकैया, अमवा, कटहरिया, कबहीगोठ, बेल्दारी र सिम्रौनगढ नाकाका केही तस्करहरुसंग मालसमान पक्राउ नगर्ने र जिल्लाको टोली निस्किने बेला जानकारी गराउने शर्तमा रकम लिएको एकजना तस्करले नाम नलेख्ने शर्तमा बताए ।
प्रहरी जवान यादवले आफुलाई केही पत्रकार र प्रहरीको बिचौलियाको समेत साथ रहेको र हाकिमले खटाउँदा मालसामान नसमात्ने भनेर आफुहरुसंग रकम लिएको ती तस्करले दाबी गरे ।
प्रहरी जवान यादवले केही सिमित तस्करहरुसंग पाँच हजारदेखी ४० हजार सम्म रकम लिएको क्राईम शाखाका एकजना प्रहरी स्रोतको दाबी छ ।
प्रहरी जवान यादवले पैसा नलिएका तस्करहरुको मालसामान कहिलेकाही समात्ने गरेको प्रहरी स्रोतले दाबी गरेको छ ।
यता कलैया बजार क्षेत्रको गस्ती र सुरक्षाको जिम्मा पाएको प्रहरीको मोबाइल सिक्स टोलीका कमान्डर असई हुसेनले पनि आर्थिक संकलनमा जोडतोडले लागेका छन ।
असई हुसेनले कलैया बजारमा तस्करीका समान ल्याउने पोके,साईकल र मोटरसाइकल तस्करहरुसंग महिनावारी रकम लिएको एकजना तस्कर स्रोतले दाबी गरेको छ ।
असई हुसेनले महिनाको दस हजार देखि २० हजार सम्म असुल गरेको स्रोतको दाबी छ ।
असई हुसेनले कलैया बजारमा समान ल्याउने तस्करहरुसंग महिनाको करिब तीन देखि चार लाख रकम असुल गरेको प्रहरी स्रोतको दाबी छ ।
हुसेनले एउटा सुर्ती पसल, कपडा पसल र एउटा मोटरसाइकल पसलमा रकम राख्न लगाउने गरेको ती प्रहरी स्रोतले दाबी गरे ।
शुरुशुरुमा कलैया बजारबाट तस्करीको मालसामान समातेका असईले भने रकम लिएपछि समात्न छोडेका छन ।
कलैया बजारमा अहिले बीरगन्ज,जितपुर सम्मका महिलाहरु र अन्य ठाउँका तस्करहरु भारतबाट कपडा, औषधि,काजु, सुर्ती सहितका समान तस्करी गरेर ल्याउने गरेका छन ।
प्रहरीको मोबाइल सिक्स टोलीको कमान्डर प्रहरी हवल्दार रहँदै आएको असई हुसेनले मोटो रकम खर्च गरेर कमाण्डर बन्न सफल भएका छन । यसअघि हवल्दार हुँदा हुसेन दुई पटक मोबाइल सिक्सका कमान्डर बन्न सफल भएका थिए ।
मोबाइल सिक्स टोलीको कमान्डर बन्न प्रहरी हवल्दारहरु मरिहत्ते गर्ने गरेका छन ।
असई हुसेन र जवान यादवले भने कसैसँग पैसा नलिएको दाबी गरेका छन ।
हुसेन र यादव पटकपटक घुमुवा र मोबाइल सिक्समा बस्न खोज्ने कारण प्रहरीको नेतृत्वले खोज्नुपर्ने मांग नागरिकले गर्न थालेका छन । श्रोत बिश्व खबरबाट
