काठमाडौं । बिहीबार साँझ अमेरिकन एयरलाइन्सको जहाज डाइभर्ट गरी कोलोराडो राज्यको डेनभर विमानस्थलमा अवतरण गरेको केही बेरमै जहाजको इन्जिनमा आगो बलेको थियो।
अमेरिकी एयरलाइन्सको फ्लाइट ४०१२ को बोइङ ७३७-८०० जहाज कोलोराडो स्प्रिङ विमानस्थलबाट डालासको फोर्ट वर्थ अन्तर्राष्ट्रिय विमानस्थलका लागि उडेको थियो।
उडानको क्रममै इन्जिनमा खराबी देखिएपछि जहाजलाई डाइभर्ट गरी डेनभर विमानस्थलमा अवतरण गराइएको थियो। अवतरण गरेपछि यात्रु ओर्लिन नपाउँदै विमानको इन्जिनमा आगलागी भएको थियो भने भित्री भागहरुबाट पनि धुवाँको मुस्लो छुटेको थियो।
धुवाँको मुस्लोले विमानस्थल नै ढाकेको थियो। यात्रुहरू झ्यालबाट निस्किएर विमानको पखेटामा लहरै बसेका थिए भनेर अमेरिकी मिडिया सिएनएनले समाचार लेखेको छ। सिएनएनले नै सार्वजनिक गरेको भिडिओमा यात्रुहरू विमानको पखेटामा उभिइरहेको देखिन्छ। उनीहरू पखेटामा उभिरहँदा जहाजबाट धुवाँको मुस्लो र आगोको लप्का छुटिरहेको थियो।
विमानस्थलमा खटिएका सुरक्षाकर्मीहरूले भर्याङ प्रयोग गरी जहाजको पंखामा रहेका यात्रुहरूलाई झारेका थिए। जहाजमा चालक दलका ६ सदस्यसहित १७२ जना यात्रु रहेको सिएनएनको समाचारमा उल्लेख छ। विमानस्थलमा खटिएका सुरक्षाकर्मी र अग्नी नियन्त्रकहरूको सक्रियताका कारण समयमै आगो निभाइएकाले मानवीय क्षति हुन नपाएको बताइएको छ।
