दाङ । भालुवाङ प्युठान चर्चित लोकदोहोरी गायक अलिफ खान अब कानुनी कठघरामा जानसक्ने सम्भावना देखिएको छ । सामाजिक सञ्जालको दुरुपयोग गर्दै उनलेे निराधार र अपमानजनक आरोप लगाएकोप्रति प्युठान जिल्ला सरुमारानी गाउँपालिका गाउँ कार्यपालिका सदस्य मोहम्मद हलिमले ती आरोपको खण्डन गरेका छन् ।
गायक खानले सामाजिक सञ्जाल फेसबुकमा आफूप्रति नाम खुलाएर व्यक्तिगत आक्षेप लगाउने, चरित्र हत्या गर्ने, र राजनीतिक रूपमा बदनाम गर्ने प्रयास गरेको भनेर हलिमले आपत्ती जनाए।
गायक अलिफ खानले हलिमलाई पार्टीशक्तिको आडमा धम्की दिएको, नैतिक र सामाजिक रूपमा पतन भएको व्यक्तिको संज्ञा दिन सामाजिक सञ्जालमै ‘चिन्ने मानिसले मलाई सम्पर्क गर्नु’ भन्ने अपमानजनक सामग्री प्रकाशन गरेका थिए । सरुमारानी गाउँपालिका–४ बड्डाँडा प्युठान निवासी मोहम्मद हलिमले आइतवार पत्रकार सम्मेलन मार्फत अलिफ खानको भनाई पूर्ण रूपमा झूटो, आधारहीन र मानहानी गर्ने नियतले गरिएको आरोप लगाएका छन् ।
टिकटकमा सामान्य टिप्पणी गरेकै कारण अलिफ खानले आफूमाथि हुँदै नभएको कुरामा आरोप लगाएर बदनाम गर्ने कोशिश गरेको हलिमले बताए । उनले भने, “मैले सामाजिक सञ्जालमा कुनै अपशब्द प्रयोग गरेको छैन। न त कसैलाई धम्की दिएको छु। तर, अलिफ खानले मेरो नाम खुलाएर सार्वजनिक रूपमा चरित्र हत्या गर्ने प्रयास गरे। यसले मेरो व्यक्तिगत इज्जत, सामाजिक प्रतिष्ठा र नैतिकतामै आँच पुर्याएको छ,“ – हलिमले भने ।
उनले सामाजिक सञ्जालको दुरुपयोग गरेर गरिएका यस्ता भ्रमपूर्ण प्रचार विरुद्ध कडा कानुनी कारबाही गर्न माग गरेका छन् । साथै निष्पक्ष छानबिन गरी दोषीलाई कारबाही गर्न सम्बन्धित निकायसमक्ष अपिल गरेका छन् । राप्ती प्रेस मञ्चका अध्यक्ष अर्जुन कुमार अधिकारीको अध्यक्षतामा पत्रकार सम्मेलन भएको थियो ।
