नवलपरासी । बर्दघाट नगरपालिका वडा नं. २ र ४ को सिमानामा पर्ने चिसापानी सामुदायिक अस्पताल अगाडि सोमबार बिहान भएको दुर्घटनामा गम्भीर घाइतेहरूलाई अस्पताल लगिएको छ।
नवलपरासी सुस्ता गाउँपालिका निवासी प्राविधिक बिरेन्द्र मण्डल चढेको बा २ ब ६५४९ नम्बरको मोटरसाइकल अचानक सडक पार गर्दा ग २ ख १५७४ नम्बरको यात्रुवाहक बसले ठक्कर दिएको थियो। ठक्करपछि बस अनियन्त्रित भई सडक किनारमा रोकेर विद्यार्थी चढाइरहेको बर्दघाट नगरपालिका वडा नं. १२ भुताहस्थित ग्लोबल एकेडेमीको लु १ ख ८७० नम्बरको स्कुल बसलाई ठक्कर दिएको थियो।
दुर्घटनामा १४ विद्यार्थी र ६ अन्य यात्रु घाइते भएका छन्। स्थानीयबासी र प्रहरीको सहयोगमा घाइतेहरूलाई उपचारका लागि अस्पताल पठाइएको छ। दुर्घटनाको थप अनुसन्धान भइरहेको प्रहरीले जनाएको छ।
