बाँके । कोहलपुरबाट प्रहरीले आधा दर्जन राष्ट्रिय प्रजातन्त्र पार्टी (राप्रपा) का नेता-कार्यकर्तालाई नियन्त्रणमा लिएको छ। पक्राउ परेका उनीहरुलाई करिब ४ घण्टा नियन्त्रणमा लिएर प्रहरीले नेपालगन्ज लिएर रिहा गरेको हो।
गत चैत १५ गते काठमाडौंको तीनकुनेको प्रदर्शनपछि पक्राउ परेका राप्रपाका उपाध्यक्ष रविन्द्र मिश्र, महामन्त्री तथा सांसद डा.धवल शम्शेर राणा लगायतको रिहाईको माग राख्दै आज कोहलपुरमा गरिएको चक्काजामका क्रममा प्रहरीले राप्रपा लगायत प्रजातान्त्रिक युवा संगठनका नेता-कार्यकर्तालाई नियन्त्रणमा लिएको थियो।
चक्काजाम गरेकै स्थल कोहलपुरबाट बिहान साढे ९ बजे पक्राउ परेका राप्रपा बाँकेका सचिव रुद्रमणि न्यौपाने, कोषाध्यक्ष भरतध्वज शाही, राप्रपा बाँकेका युवा नेता तथा प्रजातान्त्रिक युवा संगठन लुम्बिनी प्रदेश सचिव ध्रुव बर्मा, प्रजातान्त्रिक युवा संगठन बाँके अध्यक्ष युवराज शाहीसहित ६ जनालाई पक्राउ गरेर नेपालगन्ज लिएर आज दिउँसो साढे १ बजे रिहा गरेको बाँके प्रहरीले जानकारी दिएको छ।
प्रजातान्त्रिक युवा संगठन लुम्बिनी प्रदेश सचिव बर्माका अनुसार चक्काजामको कार्यक्रम सकिएपछि प्रहरीले सबैलाई रिहा गरेको हो।
राजावादी समूहले गरेको प्रदर्शनपछि पक्राउ परेका उपाध्यक्ष मिश्र र महामन्त्री राणा लगायतलाई रिहा नगरिए चरणबद्द आन्दोलन गर्ने राप्रपा बाँकेले जनाएको छ।
