बर्दिया । गुलरिया प्रहरीमाथि आक्रमण गरेको आरोपमा प्रहरीले एक जनालाई कारबाही गरेको छ । मंगलबार पक्राउ परेका ६ जनामध्ये एक जनाविरुद्ध प्रहरीले मुद्दा चलाएको छ ।
गुलरिया नगरपालिका–४ बेलौलीका बाबुराम गोडियालाई नियन्त्रणमा लिई प्रहरीले मुद्दा चलाएको हो । पक्राउ परेका अन्य पाँच जना प्रहरीमाथि हातपात नगरेको खुलेपछि तारिखमा छोडेको प्रहरीले जनाएको छ । प्रहरीमाथि आक्रमण गर्ने अन्य फरार व्यक्तीहरुको तीव्र रुपमा खोजी कार्य भइरहेको जिल्ला प्रहरी कार्यालयका डीएसपी ऋषिराम घर्ती मगरले जानकारी दिए ।
सोमबार राति गोडियाले आफ्नो छोराको मुन्डनको अवसरमा राति अबेरसम्म चर्को आवाजमा डिजे बजाई ध्वनि प्रदुषण गराएको गुनासो आएपछि प्रहरी टोली खटिएको थियो ।
प्रहरीले ध्वनि प्रदुषण नगर्न सम्झाउँदा घरधनि गोडियालगायतका व्यक्तिहरु प्रहरीमाथि लाठी तथा ढुंगा–मुढा प्रहार गरेका थिए ।
प्रहरी हवल्दार आरिफ अली बेहेनाको टाउकोमा चोट लागि औषधी उपचार भइरहेको प्रहरीले जनाएको छ । त्यसैगरी उक्त घटनामा एक जना प्रहरी जवान सामान्य घाइते भएका थिए ।
