दाङको देउखुरी ईलाका प्रहरी कार्यालय गढवा
दाङमा नयाँ प्रहरी प्रमुखका रूपमा डबल बम
दाङ । गढवा दक्षिणी देउखुरीका दुईवटै गाउँपालिकाहरु गढवा र राजपुर हेर्नेगरि नयाँ प्रहरी प्रमुख एवं प्रहरी निरीक्षक ( इन्स्पेक्टर ) डबल बम आएका छन् ।
देउखुरी क्षेत्रमा रहेका चारवटा पालिकामा क्रियाशील पत्रकारहरुसित सोमबार अपरान्ह एक परिचयात्मक कार्यक्रम गर्दै प्रहरी प्रमुख बमले सो कुरा बताएका हुन् । पत्रकारसँग कुराकानी गर्दै नदि खोलामा हुने अनैतिक दोहन, घरेलुु हिंसा, लागूऔषध तथा अपराध नियन्त्रणका साथै प्राकृतिक बिपद व्यवस्थापनमा आफ्नो प्रमुख दायित्व रहेको बताएका छन् ।
यसका साथै त्यस क्षेत्रमा अस्तव्यस्त अवस्थामा रहेकोे ट्राफिक समस्यालाई पनि हदैसम्म नियन्त्रण र व्यवस्थापन गर्ने प्रहरी निरीक्षक बमले दाबी गरेका छन् ।
राजपुर र गढवा गाउँपालिकाहरु छिमेकी देश भारतसित सिमाना जोडिएको हुनाले झण्डै तीन दर्जन जति सिमानाकाहरु पर्दछन् । साधन श्राेतले भ्याएसम्म तिमध्ये केही नाकाहरुको स्थलगत रूपमा निरीक्षण गर्ने पनि डबल बमले जानकारी गराए ।
यसका अतिरिक्त भारतीय सिमानामा हुने अवैध सामान तस्करी, चोरीपैठारी नियन्त्रणमा आफू तनमनले लाग्ने प्रतिबद्धता जाहेर गरेका छन् । अपराध नियन्त्रण गर्न घटनाको अनुसन्धानमा जतिसक्दो छिटो नागरिकको सहयोग रहन्छ, त्यति नै छिटो हामी सफल हुन्छौं, प्रहरी निरीक्षक बमले स्पष्ट पारे ।
