काठमाडौं । भारत पाकिस्तानबीच युद्धविराम लागू भएको तीन घण्टामै पाकिस्तानले पुनः उल्लंघन गर्दै जम्मु–कश्मीरका विभिन्न स्थानमा ड्रोन आक्रमण गरेको छ। श्रीनगरमा धमाकाको आवाज सुनिएपछि स्थानीयहरू त्रसित बनेका छन्।
शनिबार साँझ ५ बजेदेखि भारत–पाकिस्तानबीच युद्धविराम औपचारिक रूपमा लागू भएको थियो। तर, त्यसको तीन घण्टा नबित्दै राति ८ बजेबाट पाकिस्तानले जम्मु–कश्मीरको अखनूर, पुंछ, नौशेरा, श्रीनगर, आरएसपुरा, सांबा र उधमपुर क्षेत्रमा गोलीबारी थालेको भारतीय सुरक्षास्रोतहरूले जनाएका छन्।
राजौरी क्षेत्रमा तोप र मोर्टार प्रहार गरिएको पुष्टि भएको छ भने उधमपुरमा ड्रोन आक्रमणसमेत गरिएको छ। श्रीनगरसहित धेरै क्षेत्रमा सायरन बजाइएको छ र सुरक्षा संयन्त्र कडा पारिएको छ।
जम्मु–कश्मीरका मुख्यमन्त्री उमर अब्दुल्लाले पाकिस्तानको व्यवहारप्रति आक्रोश व्यक्त गर्दै प्रश्न उठाए‘यो कस्तो युद्धविराम हो ? श्रीनगरमा धमाकाको आवाजहरू गुञ्जिरहेका छन्।’एजेन्सी
