दाङ । घोराही युवा समाज सेवी एवं पत्रकार लेखक सबिन प्रियशनले समाजमा कहिलेकाहीँ यस्ता मानिसहरू देखा पर्छन्, जसले आफ्ना व्यक्तिगत पीडा र संघर्षलाई पनि मानवीयताको एउटा गहिरो कथा बनाउन सफल हुन्छन् । घोराही उपमहानगरपालिका वडा नम्बर १५ भित्रि रतनपुरका भक्तबहादुर बिक यस्तै प्रेरणादायी व्यक्तित्वका रूपमा चिनिनुभएको छ । उहाँको कथा हाम्रो समाजमा असल छोरा, असल श्रीमान र आदर्श पिताको जीवित उदाहरण बन्न पुगेको छ । भक्तबहादुर बिकको जीवनपथ एकदमै सहज र सुखद थिएन । दुई वर्षअघि उहाँको जीवनसंगिनी स्व. आशाकुमारी नेपालीको क्यान्सरका कारण निधन भयो ।
यो घटनाले उहाँको जीवनमा ठूलो शून्यता ल्यायो । तर, भक्तबहादुरले यो पीडालाई आफ्नो कमजोर पक्ष होइन, बलियो पक्ष बनाउनुभयो । उहाँले श्रीमतीको स्मृतिमा आफ्नै घरमा उहाँको प्रतिमा बनाउनु भयो । यो प्रतिमा अहिले सामाजिक सञ्जालमा भाइरल बनेको छ । धेरैले उहाँको भावनात्मक समर्पण र साहसको खुलेर प्रशंसा गरेका छन् । भक्तबहादुरको यो कदमले हाम्रो समाजमा पारिवारिक सम्बन्धप्रति गहिरो आस्था र श्रद्धाको सन्देश दिएको छ । उहाँले आफ्ना दुई नाबालक छोराछोरीलाई आमाको अभाव महसुस हुन नदिने गरी माया र संरक्षण प्रदान गर्दै आउनुभएको छ ।
यसैगरी, दृष्टिविहीन बुबा र वृद्ध आमालाई समेत घरमै राखेर स्याहार सुसारले भक्तबहादुरको दयालु हृदय र असल सन्तानको धर्म निर्वाहको प्रतिविम्ब प्रस्ट्याउँछ । यतिबेला समाजमा धेरैजसो मानिसहरू आफ्नो व्यक्तिगत जीवनमा आएको पीडा र संकटमा आफैं अल्झिन्छन् । तर, भक्तबहादुरले विपत्तिलाई सहानुभूति र प्रेरणामा बदल्नुभएको छ । उहाँले आफ्नी जीवनसंगिनीको सम्झनामा ‘आशा’ नामक पुस्तकसमेत प्रकाशन गर्नुभएको छ ।
यो पुस्तकमा उहाँले आफ्ना जीवनका अनुभव र पत्नीप्रतिको अमिट माया पोख्नुभएको छ । यसले उहाँको भावुकता मात्र होइन, उहाँको सृजनात्मक क्षमता र जीवनप्रतिको सकारात्मक दृष्टिकोणलाई पनि उजागर गर्दछ । यसो भन्नु नबिर्सौं, श्रीमतीको मृत्युपछि दुई साना छोराछोरीको जिम्मेवारी निभाउनु कुनै सजिलो कुरा होइन। त्यसमा पनि बृद्ध अभिभावकको स्याहारसुसारको जिम्मेवारी थपिएको छ । भक्तबहादुरले यी सबै भूमिका एकसाथ जिम्मेवारीपूर्वक निर्वाह गर्नु भएको छ । उहाँको जीवनमा आएका चुनौतीहरूलाई पराजित गर्दै उहाँले आफ्नो परिवारको बलियो स्तम्भ बन्ने निर्णय लिनुभयो । यिनै कारणले आज उहाँ असल छोरा, असल श्रीमान र असल बुबा भनेर चिनिनुभएको छ ।
समाजले पनि यस्ता उदाहरणीय व्यक्तित्वलाई सम्मान गर्न जान्नुपर्छ। उहाँको योगदान र समर्पणको कदर गर्नुपर्ने समय यही हो । उहाँलाई विशेष अभिनन्दन दिने बेला उहाँलाई ‘समर्पित श्रीमान, दयालु पुत्र र आदर्श पिता’ भनेर सम्मान गर्दा उहाँको व्यक्तित्वको सही कदर हुनेछ । यसरी उहाँको योगदानको खुलेर प्रशंसा र सम्मान गरिनुले अन्य मानिसहरूलाई पनि यस्तै भावना र आदर्श जीवनपथको प्रेरणा दिन सक्छ । आजको समाजमा जब हामी परिवारप्रति बढ्दो उपेक्षा, एकल जीवनको प्रवृत्ति र सामाजिक बन्धनको कमजोर हुँदै गएको अवस्था देख्छौं, भक्तबहादुर बिकजस्ता व्यक्तित्व हाम्रो समाजको साँचो नायक बन्ने सामथ्र्य राख्छन् ।
उहाँले देखाउनुभएको समर्पण र आस्था सामाजिक जीवनको नैतिकताको दियोजस्तै हो । उहाँले परिवारको महत्त्व र साँचो ममताको भावनालाई फेरि उजागर गर्नुभएको छ ।
भक्तबहादुर बिकको यो कथा कुनै काल्पनिक उपन्यासको अंश होइन । यो त हाम्रो समाजमा लुकेर बसेका नायकको जीवित उदाहरण हो । उहाँले जीवनमा आएका कठिनाइहरूलाई सृजनात्मक अभिव्यक्तिमा बदल्दै अघि बढ्नु भएको छ ।
यस्तो जीवन दर्शनले हामी सबैलाई सिकाउँछ—कुनै पनि सम्बन्ध, कुनै पनि माया कहिल्यै मर्दैन । यो प्रेम र सम्झना निरन्तर बाँचिरहन्छ, जबसम्म हामीले त्यसलाई आफ्नो कर्म र समर्पणमा जीवित राख्न सक्दछौं । हामी सबैको तर्फबाट भक्तबहादुर बिकलाई विशेष अभिनन्दन प्रकट गर्दै भन्न चाहन्छौं—उहाँ ‘समर्पित श्रीमान, दयालु पुत्र र आदर्श पिता’ हुनुहुन्छ । उहाँको यो यात्राले निश्चय नै हामी सबैमा न्यानो स्पर्श दिन्छ र हामीलाई परिवारप्रति समर्पित भएर बाँच्न प्रोत्साहित गर्छ । भक्तबहादुर बिकजस्ता नायकहरूले नै हाम्रो समाजलाई अझ बलियो र भावनात्मक रूपमा समृद्ध बनाउँछन् । उहाँको जीवनपद्धति र असल व्यवहारका लागि हार्दिक नमन र अभिनन्दन !
