जनकपुरधाम । प्रहरी कार्यालयको नाम र लोगो प्रयोग गरी ‘Madheshpolice Janakpurdham’ नामक फेक पेजमार्फत भ्रामक सूचना र असम्बन्धित सामग्री पोस्ट गरिन थालेपछि बुधबार प्रहरीले एक विज्ञप्ति जारी गर्दै सर्वसाधारणलाई सचेत रहन आग्रह गरेको हो ।
प्रहरीका अनुसार कार्यालयको आधिकारिक फेसबुक पेज भने ‘Madhesh Province Police Office, Janakpurdham’ हो, जसबाट मात्र कार्यालयका नियमित गतिविधि र सूचनाहरू सार्वजनिक गरिन्छ ।
तर फेक पेजबाट प्रहरीले नबोलेका र नगरेका विषयवस्तुहरू राखिँदै आएको जनाइएको छ । “फेक आईडीबाट फैलाइएका अफवाहहरूलाई लाइक, कमेन्ट वा शेयर नगर्न सबैमा अनुरोध गर्दछौँ,” विज्ञप्तिमा भनिएको छ ।
प्रहरीका अनुसार ३२०० बढी फलोअर भएको उक्त फेक पेजमा नेपाल प्रहरीको बर्दीमा रहेका एक व्यक्तिसहितका फोटोहरू प्रयोग गरिएका छन्, जुन १७ फेब्रुअरीमा जिल्ला प्रहरी कार्यालय, सप्तरीमा खिचिएको देखिन्छ ।
पेजमा केही पोस्टहरू प्रहरीसँग सम्बन्धित देखिए पनि अधिकांश सामग्री राजनीतिक विषयवस्तु र पछिल्लो घटनाक्रमसँग जोडिएका छन्, जसले प्रहरीलाई बदनाम गर्ने आशंका गरिएको छ ।
हाल फेक पेज सञ्चालनकर्ताको पहिचान गरी कानुनी कारबाहीको दायरामा ल्याउन प्रहरीले गम्भीर अनुसन्धान अघि बढाएको जनाएको छ ।
