१ वर्षको कार्यकाल पूरा गरेसँगै प्रधानमन्त्री केपी शर्मा ओलीले मन्त्रिपरिषद् पुनर्गठन गर्ने तयारीमा
काठमाडौं । संघीय सरकारले एक वर्षको कार्यकाल पूरा गरेसँगै प्रधानमन्त्री केपी शर्मा ओलीले मन्त्रिपरिषद् पुनर्गठनको तयारी थालेका छन्। सोही विषयमा छलफल गर्न प्रधानमन्त्री ओली र प्रमुख सत्ता साझेदार दल नेपाली कांग्रेसका सभापति शेरबहादुर देउवाबीच बिहीबार भेटवार्ता हुने भएको छ।
सरकार गठनपछि एक वर्षसम्म अपेक्षित गतिमा काम नगरेको भन्दै ओलीले मन्त्रिपरिषद्मा उल्लेखनीय हेरफेर गर्न चाहेका हुन्। तर, गठबन्धन सरकार भएकाले उनले कांग्रेसको सहमति खोजिरहेका छन्। यसअघि पनि ओलीले कमजोर कार्यसम्पादन देखिएका केही मन्त्रीबारे कांग्रेस नेतृत्वसँग छलफल गरिसकेका थिए।
तर, एमाले आफ्ना सबै मन्त्रीहरू फेर्ने तयारीमा देखिँदा कांग्रेस भने गृहमन्त्री रमेश लेखक र परराष्ट्रमन्त्री डा. आरजु राणा देउवा बाहेकका केही मन्त्री फेर्ने पक्षमा देखिएको छ। स्रोतका अनुसार शिक्षामन्त्री रघुजी पन्त र संघीय मामिला तथा सामान्य प्रशासनमन्त्री भगवती न्यौपाने पनि छोटो कार्यकाल भएको भन्दै यथावत् रहनेछन्।
एमालेतर्फबाट अर्थमन्त्री विष्णु पौडेल र सञ्चारमन्त्री पृथ्वी सुब्बा गुरुङ भने कायम राख्ने तयारी गरिएको छ। बाँकी मन्त्रीहरूमा व्यापक फेरबदल गरिने सम्भावना छ।
यता, केही दिनअघि लोकतान्त्रिक समाजवादी पार्टीका अध्यक्ष महन्थ ठाकुरले आफ्ना तर्फबाट श्रममन्त्री रहेका शरदसिंह भण्डारीलाई हटाउन प्रधानमन्त्रीलाई पत्र पठाइसकेका छन्। ठाकुरले पार्टी हितविपरीत गतिविधि गरेको भन्दै मन्त्री फेर्न आग्रह गरेका थिए।
श्रोतका अनुसार सम्भवतः साउनको अन्तिम साता वा भदौको सुरुमा मन्त्री फेरबदल टुंगोमा पुग्नेछ। सत्ता साझेदार दलहरूबीच सहमति जुटेपछि ओलीले मन्त्रिपरिषद् पुनर्गठन गर्ने तयारी गरेका छन्।
