माडी (चितवन) माडी नगरपालिका ३ बैराठ निवासी कालुराम मार्दनियाले माडी प्रहरीमाथि आफूलाई कुटपिट गरेको आरोप लगाउनुभएको छ।
मार्दनियाका अनुसार असोज २२ गते राति करिब १० बजे प्रहरी टोलीले “तेरो भान्जाले केटी भगाएको छ, कता छ देखाऊ” भन्दै घरमै पुगेर जथाभावी गालीगलौज र कुटपिट गरेको हो। उहाँका भनाइमा, सो क्रममा घरका महिलामाथि पनि प्रहरीले हातपात र दुर्व्यवहार गरेको थियो।
उहाँले भन्नुभयो, “प्रहरीहरूले मापसेको आरोपमा मलाई बघौडा अस्पताल लगेर डाक्टरलाई जबर्जस्ती ‘मापसे गरेको’ रिपोर्ट बनाउन दबाब दिएका थिए।”
मार्दनियाले प्रहरी चौकीमा हटकडी लगाएर कुटपिट गरिएको भिडियो CCTV फुटेज) समेत सार्वजनिक भएको दाबी गर्नुभएको छ। कुटपिटबाट उहाँको टाउकोमा चोट लागेको र हाल उपचाररत रहेको बताइएको छ।
