काठमाडौं । बेलायत विश्वमा स्तन क्यान्सरको समस्या दिनानुदिन बढिरहेको छ । यो एउटा यस्तो रोग हो जसमा स्तन कोशिकाहरु अनियन्त्रित रुपमा बढेर ट्युमरको रुप लिन्छन् । यदि त्यसमा ध्यान नदिएमा सरीरभर ट्युमर फैलिने र त्यो प्राणघातक हुनसक्छ ।
सन् २०२२ सम्म विश्वभर करीब २३ लाख महिलामा स्तन क्यान्सर पाइएको थियो र ६ लाख ७० हजार महिलाको स्तन क्यान्सरकै कारण मृत्यु भयो । त्यस्तो खतरनाक स्तन क्यान्सरप्रति सावधानी अपनाउन तथा जनचेतना वृद्धि गर्नका लागि बेलायतको विल्टशायरमा एउटा अनौठो अभियान सुरु भएको छ ।
उक्त अभियानमा प्रहरी र एक पसलका मालिकले मिलेर हजारौंवटा पुराना ब्रा जम्मा गरी स्तन क्यान्सरसँग लड्नका लागि रकम जम्मा गरेका छन् । मानिसहरुले यो अभियानलाई ब्राको पहाड नाम दिएका छन् ।
यसको सुरुवात एमिली डेभिडेजले गरेकी थिइन् । एमिलीले महिलाका अन्तरवस्त्रको एक पसल चलाउँछिन् । स्तन क्यान्सरको बढ्दो प्रकोपलाई मध्यनजर गर्दै उनले अगेन्स्ट ब्रेस्ट क्यान्सर नामक च्यारिटीका लागि ब्रा संकलन गर्न सुरु गरिन् । एमिली स्वयं पनि स्तन क्यान्सरबाट पीडित छिन् ।
उक्त अभियानमा एमिलीलाई प्रहरीले पनि साथ दियो ।
वास्तवमा विल्टशायर प्रहरीकी एक अधिकारी जर्जिना डाहल आफ्नो ब्रा को फिटिंगका लागि एमिलीको ब्रा पसलमा पुगेकी थिइन् । त्यहाँ एमिलीको कहानी सुनेपछि डाहल यतिधेरै प्रभावित भइन् कि उक्त अभियानमा आफू पनि सहभागी हुने निधो गरिन् ।
त्यसपछि उनले आफ्नो प्रहरी कार्यालय बाहिर संकलन बाकस राखिन् र आफ्नै सबै साथी तथा स्थानीयलाई उनीहरुले प्रयोग गरेका सबै पुराना ब्राहरू ल्याएर सोही बाकसमा दान गर्न अनुरोध गरिन् । विस्तारै उक्त अभियान यति व्यापक बन्यो कि ब्राको थुप्रो साँच्चीकै एउटा पहाड जस्तै बन्यो ।
अहिले मानिसहरुले आफ्ना घरघरबाट पुराना तथा नयाँ ब्राहरू ल्याएर त्यहाँ दान गरिरहेका छन् । ती ब्रालाई अगेन्स्ट ब्रेस्ट क्यान्सर च्यारिटीका माध्यमबाट क्यान्सर अनुसन्धानका लागि कोषमा परिणत गरिन्छ ।
बीबीसीका अनुसार त्यसरी संकलित एक टन ब्रा बाट करिब ७ सय पाउण्ड स्ट्रलिंग रकम जुटाइन्छ र त्यो रकमलाई क्यान्सर अनुसन्धानमा खर्च गरिन्छ ।
साथै ती ब्रालाई विकाशशील देशका महिलाहरुका सहकारीहरुलाई समेत प्रदान गरिन्छ ताकि उनीहरुले त्यसलाई पुन: प्रयोग गर्न सकून् तथा रोजगारी पनि पाउन सकुन् ।
एमिली भन्छिन् – विल्टशायर पुलिस तथा आम मानिसहरुको सहयोगलाई देखेर मेरो हृदय प्रफुल्लित भएको छ । हरेक सात जनामा एकजना महिलालाई स्तन क्यान्सर हुन्छ ।
त्यसैले यसको शीघ्र पहिचान र उपचारका लागि अनुसन्धानमा सहयोग गर्नु निकै आवश्यक छ ।एजेन्सी
