काठमाडौँ । संघीय सरकारको निर्णयअनुसार पाँच जना प्रहरी वरिष्ठ उपरीक्षकहरूलाई प्रहरी नायब महानिरीक्षक (डीआईजी) पदमा पदोन्नति गरिएको छ। नेपाल प्रहरी प्रमुख कार्यालयमा आयोजित समारोहमा प्रहरी महानिरीक्षक (आईजीपी) चन्द्रकुबेर खापुङले सोमबार उनीहरूलाई दर्ज्यानी चिन्हद्वारा सुशोभित गर्नुभयो।
पदोन्नति पाउनेमा भूपेन्द्रबहादुर खत्री, सानुराम भट्टराई, ओमप्रसाद अधिकारी, शेखर खनाल र अविनारायण काफ्ले रहेका छन्।
सो अवसरमा आईजीपी खापुङले पदोन्नति प्राप्त अधिकारीहरूलाई बधाई दिँदै व्यावसायिक, इमानदार र कर्तव्यनिष्ठ प्रहरीको छवि बनाउन निर्देशन दिनुभयो। उहाँले प्रहरी नेतृत्वलाई प्रशासनिक मात्र नभई नैतिक, रणनीतिक र प्रेरणादायी भूमिकामा रहनुपर्ने आवश्यकता औँल्याउनुभयो।
साथै उहाँले आगामी चुनौतीका सन्दर्भमा सूचना संकलन, रणनीतिक समन्वय र प्रभावकारी प्रहरी परिचालनमा ध्यान दिनुका साथै कानुन कार्यान्वयनमा कुनै सम्झौता नगर्न निर्देशन दिनुभयो। (रासस)
