भावना हमाल दैलेख माघ १९
जिल्ला प्रहरी कार्यालय दैलेखले कोरोना भाइरस संक्रमणको सम्भावना र सजगता बारे सचेतना कार्यक्रम गरेको छ ।
सदरमुकामको त्रिभुवन मावि दैलेखमा विद्यार्थीहरुका लाग गरिएको सचेतना कार्यक्रममा दैलेख जिल्ला अस्पतालका डाक्टर जगत थापाले सहजीकरण गरेका थिए ।
डा. थापाले छिमेकी देश चीनमा कोरोना भाइरस फैलिएको कारण रोकथामकोे लागि व्यक्तिगत सरसफाईमा ध्यान दिन सुझाव दिए ।
सचेतना कार्यक्रममा जिल्ला प्रहरी कार्यालयका प्रहरी नायव उपरीक्षक हरिबहादुर ओली, स्वास्थ्य कार्यालय दैलेखका प्रमुख थीरप्रसाद रेग्मी र त्रिभुवन मावि दैलेखका प्रधानाध्यापक निरक तारामीले कोरोना भाइरस लक्षण र रोकथामका उपाय बारे बोलेका थिए ।
हालसम्म कोरोना भाइरस फैलिएको चार हप्तामा चीनको हुवान प्रान्तमा २ सय ७० जनाको मृत्युु भइसकेको छ, नेपालमा २ जनामा संक्रमण भेटिएको बताइएको छ ।
कोरोना भाइरसबाट बच्न भ्याक्सिन पत्ता नलागेको कारण यसबाट बच्न नेपाल सरकारले सचेतना अभियान चलाउने नीति लिए अनुसार जिल्ला प्रहरी कार्यालयले स्वास्थ्य कार्यालय संगको समन्वयमा यो कार्यक्रम गरिएको प्रहरी निरीक्षक नैनबहादुर सावदले जानकारी दिए ।
