बुटवल । प्रहरी निरीक्षक आधारभूत तालिम १–१८४ औँ समूहका प्रशिक्षार्थी प्रहरी निरीक्षकहरूले लुम्बिनी प्रदेश अन्तर्गतका विभिन्न प्रहरी कार्यालयहरूमा व्यावहारिक अध्ययन भ्रमण सम्पन्न गरेपछि लुम्बिनी प्रदेश प्रहरी तालिम केन्द्र, बुटवलमा अन्तरक्रिया तथा बिदाइ कार्यक्रम सम्पन्न गरिएको छ ।
उक्त कार्यक्रममा लुम्बिनी प्रदेश प्रहरी प्रमुख प्रहरी नायव महानिरीक्षक भूपेन्द्र बहादुर खत्रीज्यू ले प्रशिक्षार्थीहरूसँग प्रत्यक्ष अन्तरक्रिया गर्दै व्यावहारिक अध्ययन भ्रमणका क्रममा प्राप्त अनुभव, सिकाइ तथा असल अभ्यासहरूलाई भावी प्रहरी सेवामा आत्मसात् गर्न आग्रह गर्नुभयो । उहाँले व्यावसायिक इमान्दारिता, अनुशासन, नेतृत्व, आधुनिक प्रहरी कार्यशैली तथा प्रविधिमैत्री प्रहरी सेवाको आवश्यकतामा जोड दिँदै उत्कृष्ट प्रहरी अधिकृतका रूपमा आफूलाई निरन्तर विकास गर्न प्रेरित गर्नुभयो ।
व्यावहारिक अध्ययन भ्रमणका क्रममा प्रशिक्षार्थीहरूले लुम्बिनी प्रदेश अन्तर्गतका विभिन्न प्रहरी कार्यालयहरूको कार्यप्रणाली, अनुसन्धान, शान्ति सुरक्षा, सेवा प्रवाह तथा व्यवस्थापन सम्बन्धी व्यावहारिक अनुभव हासिल गरेका छन् । कार्यक्रमको अन्त्यमा प्रशिक्षार्थीहरूलाई सफल प्रहरी जीवनको शुभकामना व्यक्त गर्दै बिदाइ गरिएको छ ।
