दाङ । घोराही जिल्ला प्रहरी कार्यालय र मातहतका इकाइहरूले जिल्लाका विभिन्न स्थानबाट उनीहरूलाई पक्राउ गरेको सूचना अधिकारी एवं प्रहरी नायब उपरीक्षक डा. हेमबहादुर केसीले जानकारी दिनुभयो।
उहाँका अनुसार पक्राउ परेकामध्ये फैसला भएको १० वर्षपछि ९ जना, ५ वर्षपछि ७ जना र ५ वर्षभित्र ६० जना रहेका छन्। अदालतले उनीहरूलाई ९ वर्ष २ महिना २५ दिन कैद र ३ लाख ८८ हजार ५६७ रुपैयाँ जरिवाना सुनाएको थियो।
*अपराधको अवस्था:*
असोजमा अपराधसम्बन्धी ७३ वटा मुद्दा दर्ता भएका छन् भने ६६ जना पक्राउ परेका छन्। दर्तामध्ये जघन्य तथा गम्भीर अपराधका १०, महिला, बालबालिका तथा ज्येष्ठ नागरिकसँग सम्बन्धित १०, आर्थिक अपराधका ८ र अन्य ४५ वटा मुद्दा छन्।
लागुऔषधतर्फ १४ जना पक्राउ परेका छन् — ४३.१५० ग्राम ब्राउन सुगरसहित १२ जना, ३ किलो ८२५ ग्राम गाँजासहित १ जना र १५ एम्पुल सिरिन्जसहित १ जना।
अवैध नदीजन्य पदार्थ उत्खनन तथा ओसारपसारमा ४ टिपर र २३ ट्र्याक्टर गरी २७ सवारी नियन्त्रणमा लिइएको र ७ लाख १ हजार ५६९ रुपैयाँ राजस्व संकलन गरिएको केसीले बताउनुभयो।
*प्रविधिले चोरी नियन्त्रण:*
जिल्ला प्रहरी प्रमुख प्रहरी उपरीक्षक दीपक श्रेष्ठका अनुसार चाडपर्वमा प्रहरी सक्रियता र प्रविधिको प्रयोगले चोरीका घटना घटेका छन्।
“विगतका वर्षहरूमा चाडपर्वमा बजार क्षेत्रमा चोरी हुन्थ्यो। यसपटक गस्ती बढाएर बजार क्षेत्रमा ड्रोन क्यामेराबाट समेत निगरानी गरियो, त्यसैले चोरी हुन पाएन,” एसपी श्रेष्ठले भन्नुभयो। यो निगरानी तिहारसम्म जारी रहने र टोलवासीले पनि सिसी क्यामेरा जडान गर्नुपर्ने उहाँको आग्रह छ।
