काठमाडौं प्रेस काउन्सिल नेपालले देशभरिका १७ वटा अनलाइन, टिभी र पत्रिकासँग स्पष्टीकरण सोधेको छ । त्यस्तै, विभिन्न ७ वटा अनलाइनहरुलाई देशभरिबाट हेर्न नमिल्ने गरी ‘लक’ गरिएको छ । जनस्वास्थ्यसम्बन्धी भ्रामक, उत्तेजक शीर्षक राखी अपुस्ट समाचार सम्प्रेषण गर्ने १७ वटा अनलाइन, टिभी र पत्रिकासँग काउन्सिलले स्पष्टीकरण सोधेको हो । पत्रकार आचारसंहिताविपरीतका ती सामग्री हटाउन लगाउनुका साथै २४ घण्टे स्पस्टीकरण सोधिएको प्रेस काउन्सिलका कार्यवाहक अध्यक्ष किशोर श्रेष्ठले जानकारी दिनुभयो । कार्यवाहक अध्यक्ष श्रेष्ठका अनुसार दर्ता नभई सञ्चालित त्यस्ता अरु ७ वटा अनलाइनहरुलाई भने सिधै नेपालभरि हेर्नै नमिल्ने बनाइएको छ । तिनलाई ‘लक’ गरिएको छ ।
