चाकरचौडाको छोटी भन्सार कार्यालय सहयोगीको भरमा ॥

राघवेन्द्र चौबे (पकडी )कपिलवस्तु -२२
नायब सुब्बाको दरबन्दी रहेको कपिलवस्तु जिल्लाको मायादेवी गाउँपालिका स्थितमा रहेको चाकरचौडा छोटी भन्सार कार्यालय सहयोगीका भरमा सञ्चालन हुँदै आएको छ । नायब सुब्बा काज सरुवा मिलाएर अन्यत्र जाने गरेका कारण भन्सार कार्यालय सहयोगीले सञ्चालन गर्दै आएका हुन् । दरबन्दी अनुसार कर्मचारी नहुँदा भन्सार कार्यालयले न्यून राजश्व संकलन गर्दै आएको छ ।कार्यालयमा एक्लै बस्ने भएकाले असुरक्षा हुँदा सन्तोष जनकरुपमा राजश्व उठाउन नसकेको कार्यालय सहयोगी भीम चन्द बताउनुभयो । मुस्किलले महिनामा ८ हजारको हाराहारीमा राजश्व उठ्ने गरेको उहाँले बताउनुभयो । दिउँसो सशस्त्र प्रहरीले भन्सार कार्यालयमा सुरक्षा दिए पनि राति एक्लै बस्नुपर्ने भएकाले समस्या भएको चन्द बताउनुहुन्छ I संरचना मर्मत सम्भारको अभावमा बर्षातको समयमा पानीको ढल निकास नहुँदा कार्यालय जीर्ण बन्दै गएको छ I कार्यालयको स्वामित्वमा रहेको जग्गा प्रयोग विहीन अवस्थामा रहेको छ ।