ABC (क्राईमबिट)
बाँके । सिमा प्रहरी कार्यालय जयसपुरका प्रमुख प्रहरी नायब निरीक्षक राजकुमार सिंहको कमान्डसहित रहेको लागू औषध व्युरो र जिल्ला प्रहरी बाँकेबाट प्रहरी सहायक निरीक्षक बिबेक अधिकारीको टोलीले नेपालगञ्ज १७ स्थित चौलिका चोकदेखि पश्चिम तर्फबाट ३० ग्राम लागूऔषध ब्राउनसुगर र १ लाख ८० हजार ९ सय रुपैयाँसहित तीन जनालाई पक्राउ गरेको जिल्ला प्रहरी बाँकेले जानकारी दिएको छ ।
जिल्ला प्रहरी बाँकेका अनुसार पक्राउ पर्नेमा ४५ बर्षीया मुन्नी जोलाह, ३५ बर्षीया जरिना अन्सारी र ३९ बर्षीय कल्लु जोलाह रहेका छन् । लुकिछिपी नेपालगञ्जतर्फ आउँदै गरेका तीन जनालाई प्रहरीको टोलीले नेपालगन्ज १७ चौलिका चोकदेखि पश्चिमतर्फ रहेको थुकैला गाउँबाट लागूऔषध ब्राउनसुगर र पैसा ल्याउँदै गरेको अवस्थामा पक्राउ गरेको हो । बिशेष सूचनाका आधारमा गएको टोलीले शंकाष्पद तरिकाले नेपालगञ्ज आउँदै गरेका उनीहरुलाई चेकजाँचका क्रममा रङ्गेहात पक्राउ गरेको हो ।
पक्राउ परेका मुन्नी, जरिना र कल्लुलाई हिरासतमा राखी लागूऔषध कसुरमा थप अनुसन्धान भइरहेको प्रहरीले जानकारी दिएको छ । १५ दिन अघि मात्र सिमा प्रहरी कार्यालय जयसपुरको कमान्ड सम्हालेका प्रहरी नायब निरीक्षक सिंहले तस्करी र लागूऔषध कारोबारी विरुद्ध धावा बोल्दै आएका छन् ।
