ABC (क्राईमबिट)
काठमाडौं । गृहमन्त्रालयले नवनियुक्त तीन प्रहरी नायब महानिरीक्षक (डीआईजी) हरुको पदस्थापन लगत्तै काज सरुवा गरेको छ । आइतबारको गृहमन्त्रीस्तरीय निर्णय अनुसार दरबन्दीमा पदस्थापन भएका नवनियुक्त तीन डीआईजीहरुलाई काज सरुवा गरेर अन्य युनिटको जिम्मेवारी दिइएको छ ।
यसअगाडी प्रहरी वरिष्ठ उपरीक्षक (एसएसपी) ले नेतृत्व गर्दै आएको काठमाडौं उपत्यका ट्राफिक प्रहरी कार्यालय रामशाहपथ, नेपाल प्रहरी शिक्षालय भरतपुर चितवन र त्रिभुवन अन्तर्राष्ट्रिय बिमानस्थल सुरक्षा कार्यालयमा प्रहरी नायब महानिरीक्षक (डीआईजी) खटाइएको छ ।
आइतबारको पदस्थापनमा प्रदेश प्रहरी समन्वय बिभागमा पदस्थापन भएका डीआईजी सन्दीप भण्डारीलाई नेपाल प्रहरी शिक्षालय भरतपुर चितवनमा काजमा खटाइएको छ । त्यस्तै प्रहरी प्रधान कार्यालयको महिला बालबालिका तथा जेष्ठ नागरिक सेवा निर्देशनालयमा पदस्थापन भएकी डीआईजी मिरा चौधरीलाई काठमाडौं उपत्यका ट्राफिक प्रहरी कार्यालय रामशाहपथको प्रमुखको जिम्मेवारी दिइएको छ भने केन्द्रिय साइबर ब्यूरोमा पदस्थापन गरिएका डीआईजी श्यामलाल ज्ञवालीलाई त्रिभुवन अन्तर्राष्ट्रिय बिमानस्थल सुरक्षा कार्यालयको प्रमुखको जिम्मेवारीमा काज सरुवा गरिएको प्रहरी प्रधान कार्यालयले जनाएको छ ।
डीआईजीको दरबन्दी रहेको केन्द्रिय साइबर ब्यूरोको नेतृत्व हाललाई प्राविधिक प्रहरी वरिष्ठ उपरीक्षक (एसएसपी) नविन्द अर्यालले सम्हाल्नेछन् । आइतबारको गृहमन्त्रीस्तरीय निर्णयले एसएसपी प्रमुख रहने तीन कार्यालयमा काजमा डीआईजी खटाइएसंगै सरकारले नेपाल प्रहरीमा तीन डीआईजी पदको लागि दरबन्दी थपको योजना अगाडी बढाएको अनुमान गरिएको छ ।
