(ABC-Sanchar)
काठमाडौँ । नेपाली काँग्रेसका नेता प्रदीप गिरीको निधन भएको छ । प्रतिनिधिसभा सदस्यसमेत रहेका ७५ वर्षीय गिरिको मेडिसिटी अस्पतालमा शनिबार राति निधन भएको उपचारमा संलग्न क्यान्सर रोग विशेषज्ञ डा. पंकजकुमार बर्मनले जानकारी दिए ।
तीन सातादेखि उपचाररत गिरीलाई शुक्रबार भेन्टिलेटरबाट निकालेर आइसियुमा राखिएको थियो ।
लामो समय भारतमा उपचार गरेर स्वदेश फर्किएका उनको स्वास्थ्यमा समस्या देखिएपछि मेडिसिटी भर्ना भएका थिए । घाँटीको क्यान्सरबाट पीडित उनलाई निमोनियासमेत देखिएपछि स्वास्थ्यमा थप जटिलता देखिएको थियो ।
भारतको जवाहरलाल नेहरु विश्वविद्यालयबाट दर्शनशास्त्र र अर्थशास्त्रमा स्नातकोत्तर गरेका गिरी २०१७ सालमा काँग्रेसमा आबद्ध भएका थिए। काँग्रेस केन्द्रीय सदस्य र प्रतिनिधि सभा सदस्य रहेका गिरी अन्य दलका नेता तथा कार्यकर्तामाझ पनि लोकप्रिय थिए।
दर्जन बढी पुस्तकका लेखकसमेत रहेका उनी नेपालमा मार्क्सवादको राम्रो व्याख्या गर्न सक्ने व्यक्तिमा गनिन्छन् ।
