(ABC-Sanchar)
पर्सा । बिरगंज आइतबार बेलुकी राजनीतिक दल सम्बद्ध विभिन्न विद्यार्थी सङ्गठनहरूले मशाल जुलुस निकालेका छन् । वीरगञ्जस्थित ठाकुरराम बहुमुखी क्याम्पसको परीक्षा केन्द्र बारा जिल्लामा सारिएको विरोधमा नेवि सङ्घ, अनेरास्ववियू, समाजवादी विद्यार्थी युनियनलगायतका विद्यार्थी सङ्गठनहरूले संयुक्त रूपमा मशाल जुलुस निकालेका हुन् ।
विद्यार्थीहरूले निकालेको मशाल जुलुसमा प्रहरीले हस्तक्षेप गरेर बल प्रयोग गर्दा चार जना विद्यार्थी नेता घाइते भएका छन् । घाइते हुनेहरूमा अनेरास्ववियूका जिल्ला सचिव पवन यादव, अनेरास्ववियूकै क्याम्पस इकाई उपाध्यक्ष अरमान हासमी, नेवि सङ्घका बिट्टू पटेल र समाजवादी विद्यार्थी युनियनका हरि यादव रहेका छन् । उनीहरूको नारायणी अस्पतालमा उपचार गरिएको अनेरास्ववियूका वीरगञ्ज महानगर अध्यक्ष आसिफ अहमदले जानकारी दिए ।
आइतबार बेलुकी वीरगञ्जको तीन स्थानबाट एकैसाथ निकालिएको मशाल जुलुस घण्टाघर चोकमा पुग्दा प्रहरीले हस्तक्षेप गरी बल प्रयोग गरेको नेवि सङ्घ पर्साका सभापति रमेश यादवले बताए ।
ठाकुरराम बहुमुखी क्याम्पसको व्यवस्थापन सङ्कायको स्नातक तहको तेस्रो वर्षको परिक्षा त्रिभुवन विश्वविद्यालयले बाराको सिमरामा सारेपछि त्यसको विरोधमा पर्साका विद्यार्थी सङ्गठनहरूले आन्दोलन गर्दै आइरहेका छन् । ठाकुरराम क्याम्पसबाट अन्यत्र सारिएको परिक्षा केन्द्र फिर्ता ल्याउन माग गर्दै विद्यार्थी सङ्गठनहरूले एक हप्तादेखि ठाकुरराम क्याम्पस बन्द गराएका छन् ।
यहीबिचमा परिक्षा केन्द्र सिमरामा सारिएपछि गत सोमबार त्यहाँ परिक्षा दिएर फर्कने क्रममा मोटरसाइकल दुर्घटनामा परि ठाकुरराम क्याम्पसमा अध्ययनरत विद्यार्थी विजय शर्माको मृत्यु भएपछि विद्यार्थीहरू थप आक्रोशित भएका छन् ।
परिक्षा केन्द्र फिर्ता ल्याउनु पर्ने र दुर्घटनामा परि मृत्यु भएका विद्यार्थी शर्माको परिवारलाई क्षतिपूर्ति दिनु पर्ने माग गर्दै आइतबार बेलुकी मशाल जुलुस निकालिएको नेवि सङ्घका सभापति यादवले बताए । आफूहरूको माग पुरा नगरिए आन्दोलन अझ चर्काउँदै लग्ने चेतावनी पनि उनले दिए ।
