(ABC-Sanchar)
नुवाकोट । सुरक्षाकर्मी परिचालन गरेर पाँच दिनपछि बन्चरेडाँडा ल्यान्डफिल साइटमा उपत्यकाको फोहोर विसर्जन गरिएको छ । काठमाडौंबाटै फोहोर बोकेका १ सय ५० वटा गाडीलाई स्कर्टिङ गर्दै नेपाल प्रहरी र सशस्त्र प्रहरीले बन्चरेडाँडा पुर्याइरहेका छन् ।
टोलीले सुरक्षा दिएर फोहोर फाल्न लागिएको र त्यसको सबै व्यवस्थापन काठमाडौंबाट भइरहेको जिल्ला प्रहरी कार्यालय नुवाकोटले जनाएको छ । नेपाल प्रहरी र सशस्त्रसहित पौने दुई सयको संख्यामा सुरक्षाकर्मी परिचालन गरिएको छ । उनीहरुले स्कर्टिङ गरेर बन्चरेडाँडा ल्याडफिल्ड साइटमा फोहोर फाल्न लागिएको हो ।
फोहोर र मान्छे छुट्याउनुपर्ने भन्दै ककनी गाउँपालिका र धादिङको धुनीबेंसी नगरपालिकाका स्थानीयले संयुक्तरुपमा ५ दिनदेखि आन्दोलन जारी राखेका छन् । आन्दोलनकारीले उपत्यकाबाट प्रवेश गर्ने फोहोर बोक्ने गाडीलाई बन्चरेडाँडा ल्यान्डफिल साइटमा जान रोक लगाउँदै आएका थिए । २०६२/०६३ सालमा केही वर्षका लागि उपत्यकाकाको फोहार ओखरपौवाको सिसडोलमा बिसर्जन गरिएको थियो । त्यहाँ भरिएपछि डेढ किमि तल नयाँ ल्यान्डफिल साइट बन्चरेडाँडामा निर्माण गरेर केही वर्षदेखि फोहोर बिसर्जन हुँदै आएको छ ।
बन्चरेडाँडामा दैनिक १ सय ८० ट्रकमार्फत फोहोर फाल्ने गरिएको छ । काठमाडौं महानरपालिकासहित १७ वटा स्थानीय तहबाट निस्केका १०–१२ टन फोहोर दैनिकरुपमा बन्चरेडाँडामा फालिँदै आएको छ ।
