(ABC-Sanchar)
काठमाडौं । सरुवा प्रणालीलाई व्यवस्थित बनाउन संघीय मामिला तथा सामान्य प्रशासन मन्त्रालयद्वारा गठित कार्यदलले निजमती कर्मचारीहरुलाई निरन्तर तीन वर्ष वा सोभन्दा बढी अवधि काठमाडौं उपत्यकाभित्र बस्न नपाउने गरी सरुवा मापदण्ड बनाउन सुझाब दिएको छ।
शक्ति र पहुँचका आधारमा लामो समयदेखि सिंहदरबार र काठमाडौं उपत्यकामा ठूलो संख्याका कर्मचारी रहने, तर बाहिर अभाव हुने समस्या समाधानका लागि कार्यदलले यस्तो सिफारिस गरेको हो । यसरी सरुवा गर्दा काठमाडौं उपत्यका वा सो भन्दा बढी कार्यरत कर्मचारीलाई कार्यावधिको ज्येष्ठताका आधारमा उपत्यकाबाहिर सरुवा गर्नु उपयुक्त हुने भनेको छ। यस्तै कर्यादलले दुई वर्षसम्म सम्बन्धित प्रदेश र क्षेत्रभित्र मात्र सरुवा गर्नुपर्ने र स्थानीय तहका प्रमुख प्रशासकीय अधिकृत प्रदेशबाटै नियुक्त गर्नुपर्ने देखि एउटा पालिकामा दुई वर्ष बस्नैपर्ने रमाना नलिनेलाई कारबाही गर्नुपर्ने,आन्तरिक प्रतिस्पर्धा र बढुवाको उम्मेदवार बन्न सेवा र अनुभवको सर्त लगायतका सुझाब दिएको छ ।
काठमाडौं तथा सुगम क्षेत्रमा मात्र आकर्षित कर्मचारीलाई दुर्गममा जान प्रेरित गर्न नसकिएको, भनसुनका आधारमा मात्र सरुवा हुन्छ भन्ने सोचले कर्मचारी कार्यालयको काम छोडेर महिनौँसम्म सरुवाको दौडधुपमा लाग्ने प्रवृत्ति समस्याको रुपमा रहेको कार्यदलले प्रतिवेदनमा उल्लेख गरेको छ । सरुवा प्रणालीलाई व्यवस्थित बनाउन भन्दै संघीय मामिता तथा सामान्य प्रशासनमन्त्री अमनलाल मोदीले गत २९ जेठमा मन्त्रालयका सहसचिव बलराम रिज्यालको संयोजकत्वमा कार्यदल गठन गरेका थिए ।
