ABC (क्राईमबिट)
बर्दिया । सीमावर्ती भारत उत्तरप्रदेश राज्य बहराईच जिल्लाअन्तर्गत निशानगाढा रेन्जपोष्टले पाँच नेपालीलाई वन्यजन्तु अपराधको आरोपमा कारागार चलान गरेको छ । उनीहरुमाथि कतरनियाघाट वन्यजन्तु सेन्चुरीमा बुधबार अवैधरुपमा प्रवेश गरी माछा मारेको र कछुवा लिएर फर्किएको आरोप भारतीय वनका कर्मचारीले लगाएका छन् ।
पक्राउ पर्नेमा मधुवन नगरपालिका–४ का सुनिता चौधरी, सुन्दरी चौधरी, राजकुमारी थारु, महिमा चौधरी र रामबहादुर थारु रहेको जिल्ला प्रहरी कार्यालय, बर्दियाका सूचना अधिकारी एवं डीएसपी तुल्सीराम अर्यालले भारतीय वनका कर्मचारीलाई उद्धृत गर्दै जानकारी दिएका छन् ।
कैलाशपुरीमा माछा मारेको र कछुवा लिएर आउने क्रममा पक्राउ परेको भारतीय वनरक्षकले उनीहरुलाई झुटो आरोप लगाएर मुद्दा दायर गरेको आशंका स्थानीयको छ । पाँचै जनालाई जिल्ला कारागार बहराइच लगिएको डीएसपी अर्यालले बताए ।
