काठमाडौं । जुनियर ब्याचका अधिकृतलाई बढुवा गर्न दबाब दिएपछि ६ वर्षअघि तत्कालिन प्रहरी महानिरीक्षक प्रकाश अर्याल इन्सपेक्टरको बढुवा महिनौं रोकेर अवकाशमा गए । नेपाल प्रहरीमा अहिले पनि त्यही अवस्था दोहोरिने सम्भावना छ ।नेपाल प्रहरीमा हाल बढुवाबाट पुर्ति गर्नुपर्ने इन्सपेक्टरका ५१ पद रिक्त छन् । जसमा दुई सयभन्दा धेरै वरिष्ठ सईबीच प्रतिस्पर्धा छ । कतिपय जुनियर ब्याचका वरिष्ठ सईहरु शक्तिशाली भएकाले आईजीपी बसन्तबहादुर कुँवरले बढुवा गर्न सकेका छैनन्।आईजीपी कुँवरको कार्यकाल अब १७ दिन मात्र बाँकी छ । यो अवधिमा सईमाथि इन्सपेक्टरमा बढुवाको सहमति हुने सम्भावना घट्दै गएको स्रोत बताउँछ । जुनियरहरुलाई बढुवा गर्न अत्याधिक दबाब आएपछि उनी बढुवा नै नगर्ने मुडमा छन् ।
इन्सपेक्टर बढुवामा २०५४ सालमै भर्ना भएका ६ जना वरिष्ठ सई छन् । द्वन्द्वको समयमा जागिर छाडेकाले उनीहरु यसअघिदेखि नै बढुवामा छुट्दै आएका छन् । यसपटक पनि उनीहरुको सम्भावना न्यून छ ।बढुवाको मुख्य दाबेदार २०५८ सालमा असइबाट भर्ना भएको ११३ को टोली हो । जून ब्याचबाट हाल ९७ जना सेवामा छन् । यही ब्याचबाट मात्र बढुवा गर्दा पनि ४६ जना छुट्ने अवस्था छ ।
तर, २०६० सालमा भर्ना भएको ब्याचको दबाबका कारण बढुवा हुन नसकेको स्रोत बताउँछ । सो ब्याचका अधिकृतहरु हाल शक्तिशाली व्यक्तिका पिएसओ बसेका छन् ।
कांग्रेस सभापति शेरबहादुर देउवाको सुरक्षा टोलीका कार्यरत रबिन शाह, परराष्ट्रमन्त्री आरजु देउवाकी पिएसओ रश्मी सिलवाल, गृहमन्त्री रमेश लेखकका पिएसओ रमेश पाण्डे, अख्तियार दुरुपयोग अनुसन्धान आयोगका प्रमुख आयुक्त प्रेम कुमार राईका पिएसओ सनम राई लगायत जसरी पनि बढुवा हुनुपर्ने सूचीमा छन् ।त्यस्तै, कांग्रेस नेता पूर्णबहादुर खड्का पिएसओ रोशन थापा, पूर्वप्रधानन्यायाधीश विश्वम्भर श्रेष्ठका पिएसओ ईश्वर तन्डुकार लगायतले पनि शक्तिकेन्द्रबाट दबाब दिइरहेका छन् । जसकारण नयाँ आईजीपी आएपछि मात्र सईबाट इन्सपेक्टरमा बढुवा हुने परिदृश्य नेपाल प्रहरीमा देखिएको छ।
