दाङ । अवैध बाटो हुँदै अमेरिका पुग्नु नेपालीहरूको रहर होइन बाध्यता हो । परिवार र देश छाडेर पैसाका लागि पराई भूमी बस्ने रहर कसलाई पो हुन्छ र ? यो त हाम्रो गरिबी र बेरोजगारीले उत्पन्न गरेको विकराल समस्या हो ।
नेपाल फर्केकाहरूलाई हेयको भावले होइन सम्मानका साथ व्यवहार गरौं । उनीहरूलाई अहिले भावनात्मक साथ चाहिएको छ । आफन्त र समाजले साथ दिने भनेको अफ्ठेरोको बेला हो ।
सफलता र प्रगति गर्दा साथ दिने तर, अफ्ठेरो पर्दा उल्टै खिसिट्यु गर्ने समाजको चरित्र बनेको छ । अफ्ठेरोका बेला साथ दिनेहरू नै असल आफन्त हुन् ।
सरल जीवनशैली अपनाउने हो भने थोरै कमाईले पनि जीवन चलाउन सकिन्छ । रातारात धनी बन्ने महत्वाकांक्षाले हाम्रो जीवन नै बरबाद पार्छ । हामी युवाहरू पनि थोरै कमाइ र चोखो कमाइमा खुसी हुन सिकौ । अवैध ढंगले आर्जन गरिएको सम्पत्तिले कोही खुसी हुन सक्दैन । यो त बुढेशकालको पश्चातापको कारण मात्र बन्छ ।
