काठमाडौं । अवकाश पाएको दुई महिनामै पूर्व एआईजी भरतबहादुर बोहरा सरकारबाट नयाँ जिम्मेवारीमा नियुक्त भएका छन्। उनलाई सरकारले मिटरब्याजसम्बन्धी जाँचबुझ आयोगको सदस्य बनाएको हो।
सोमबार बसेको मन्त्रिपरिषद् बैठकले पूर्वन्यायाधीश बाबुराम रेग्मीको अध्यक्षतामा आयोग गठन गरेको हो। आयोगमा बोहरा सहित बद्रीप्रसाद भट्टराई सदस्यको रूपमा नियुक्त भएका छन्।
बोहरा कांग्रेस सभापति शेरबहादुर देउवाका पूर्व पीएसओ हुन्। कांग्रेस नेतृत्वसँग निकट भएकै कारण उनी अवकाश हुनुभन्दा १० दिनअघि एआईजीमा बढुवा भएका थिए भने अवकाश पाएको दुई महिनामै नयाँ नियुक्ति पाएका छन्।
तर, बोहरामाथि आफैंले मिटरब्याज व्यवसायबाट पैसा आर्जन गरेको आरोप पनि छ। उनका सहकर्मीहरूले उनले मिटरब्याजमा संलग्न भएको दाबी गरेका छन्। यसअघि पूर्व एआईजी पुष्कर कार्की र उत्तमराज सुवेदी पनि यस्तै आयोगमा संलग्न भइसकेका थिए।
