काठमाडौं । राष्ट्रिय प्रजातन्त्र पार्टीका वरिष्ठ नेता पशुपति शमशेर जबराले भद्रकालीस्थित प्रहरी परिसर पुगेर आफ्ना पार्टीका नेतालाई भेटेका छन् । वरिष्ठ उपाध्यक्ष रवीन्द्र मिश्र, महामन्त्री डा. धवल शमशेर राणा र स्वागत नेपाल लगायतलाई भेटेका हुन् । वरिष्ठ नेता पशुपतिसँगै नेता डा. प्रकाशचन्द्र लोहनी लगायत पनि पुगेका थिए ।
काठमाडौंको तीनकुनेमा शुक्रबार भएको प्रदर्शनलाई उत्तेजित बनाएको आरोपमा प्रहरीले राती पक्राउ गरेको थियो । घटनाबारे सोधपुछ गर्न उनीहरुलाई पक्राउ गरिएको प्रहरीले जनाएको छ । राजसंस्था पुनःस्थापनाका लागि जनआन्दोलन समितिका संयोजक नवराज सुवेदीलाई प्रहरीले घरमै नियन्त्रणमा राखेको छ ।
उक्त घटनामा प्रहरीले १ सय ५ जनालाई नियन्त्रणमा लिइसकेको छ । प्रदर्शनका कमान्डर भनिएका दुर्गा प्रसाईंको भने प्रहरीले खोजी गरिरहेको जनाएको छ । सामाजिक सञ्जाल फेसबुकमा स्टाटस लेख्दै प्रसाईले प्रहरीले कार्यक्रम हुन नदिने सुरुमै अश्रु ग्याँस प्रहार गरेको दाबी गरेका छन् ।
