दाङ । भालुबाङ,नेपाल पत्रकार महासङ्घ, लुम्बिनी प्रदेश समितिले शुक्रबार राजावादीहरूको आन्दोलनका क्रममा भएकाे पत्रकार सुरेश रजकको हत्या क्रूर र जघन्य अपराध भएकाे निष्कर्ष निकालेकाे छ ।
नेपाल पत्रकार महासंघ लुम्बिनी प्रदेश समितिका महासचिव पाण्डवप्रसाद शर्माले शनिबार विज्ञप्ति जारी गरेर घटनाप्रति गम्भीर ध्यानाकर्षण भएकाे जनाउनुभएकाे छ ।
राजावादीहरूकाे आन्दाेलनकाे क्रममा रिपोर्टिङमा रहनुभएका पत्रकार सुरेश रजकको हत्या हुनुका साथै अन्नपूर्ण पोस्ट दैनिक, अनलाइन खबर र कान्तिपुर टेलिभिजनको कार्यालयमा तोडफोड तथा आगजनीको प्रयास भएको थियाे । महासङ्घले पत्रकार रजकप्रति हार्दिक श्रद्धाञ्जलि अर्पण गर्दै शोकसन्तप्त परिवारजनप्रति गहिरो समवेदना व्यक्त गरेको छ।
“रिपोर्टिङको क्रममा रहेका पत्रकारको जघन्य हत्या, सञ्चारगृहमा भएको आक्रमण र सञ्चारकर्मीहरूप्रति गरिएको क्रूर व्यवहारले गम्भीर आघात पुर्याएको महासङ्घले जनाएको छ,” महासचिव शर्माद्वारा जारी विज्ञप्तिमा उल्लेख गरिएको छ, “यस्ता अमानवीय घटनाले प्रेस तथा अभिव्यक्ति स्वतन्त्रता र पेशागत भूमिकामाथि गम्भीर खतरा उत्पन्न भएको महासङ्घको ठहर छ, महासङ्घले यस्ता क्रूर र जघन्य अपराधको कडा शब्दमा भर्त्सना र निन्दा गर्दछ ।” यस्ता कार्यमा संलग्न जोसुकैलाई तत्काल कानुनी दायरामा ल्याई कडा कारबाही गर्न महासंघले जोडदार माग गरेको छ ।
यी घटनालाई मध्यनजर गर्दै महासङ्घले स्थापना दिवसको अवसरमा चैत १६ गतेका लागि तय भएका सबै औपचारिक कार्यक्रम स्थगित गरेको छ । यो वर्षको स्थापना दिवसलाई उत्सवको रूपमा नभई शोक, विरोध र आन्दोलनको रूपमा मनाउने निर्णय गरिएको छ । सोहीअनुसार लुम्बिनी प्रदेशमा पनि विभिन्न बिराेध कार्यक्रम भइरहेका छन् ।
महासङ्घले सरकार र सम्बन्धित सुरक्षा निकायसँग यस्ता जघन्य घटनाको तत्काल, निष्पक्ष र सूक्ष्म छानबिन गरी दोषीहरूलाई कानुनी सजाय दिन माग गरेको छ। प्रेस स्वतन्त्रता र पत्रकारको सुरक्षाको प्रत्याभूति गर्न राज्यले आफ्नो दायित्व निर्वाह गर्नुपर्नेमा महासङ्घले जोड दिएको छ । यो कठिन समयमा सबैको साथ र सहयोगको अपेक्षा गर्दै प्रेस स्वतन्त्रता र जिम्मेवार पत्रकारिताको पक्षमा अडिग रहने प्रतिबद्धता महासङ्घले व्यक्त गरेको छ ।
