काठमाडौं । शुक्रबार साढे ७ बजे उच्च अदालत बुटवलको तुलसीपुर इजलासले राष्ट्रिय स्वतन्त्र पार्टी (रास्वपा) का सभापति रवि लामिछानेलाई थुनामा पठाउने आदेश गर्यो । केहीबेरमै उनले सम्मानित अदालतको आदेशको सम्मान गर्दै आफैं आजै अहिले नै गिरफ्तारी दिने बताए ।
‘सम्मानित अदालतको आदेशको सम्मान गर्दै म आफैं आजै अहिले नै गिरफ्तारी दिंदैछु,’ लामिछानेले भिडिओमार्फत भनेका थिए, ‘ साथै न्यायालयका अन्य ढोकाहरू मेरा लागि खुला होलान् नै । न्यायका लागि दुनियाँका सबै ढोका ढकढक्याउँछु ।’
तर, भिडिओमार्फत आफैं गिरफ्तारी दिने कुरा गरिरहँदा लामिछानेको बुढानिलकण्ठस्थित निवासमा प्रहरी पुगिसकेको थियो । अदालतको लिखित आदेशको प्रति विना लामिछानेको घर पुगेको प्रहरीले अदालतको आदेश कार्यान्वयनका लागि भन्दै आफूहरूसँगै जान भनेका थिए ।
तर, लामिछानेले औपचारिक कागजात माग्न खोजे । त्यसपछि लामिछानेको कोठामा रहेका अन्य रास्वपा नेता तथा सहयोगीहरुले प्रहरीलाई ‘तयारी गरेर आउनु पर्दैन ?’ भन्दै प्रश्न गर्न थाले । त्यसपछि केही बेर प्रहरी र लामिछानेका समर्थकबीच सवाल जवाफ समेत भयो ।
सोही क्रममा लामिछानेलाई पक्राउ गर्न पुगेका एक प्रहरीले उनको अन्तिम इच्छा सोधे ? त्यसपछि झनै विवाद बढ्यो । पक्राउका लागि काठमाडौं उपत्यका अपराध अनुसन्धान कार्यालयका एसएसपी रमेश बस्नेत, एसपी मनोहर भट्ट, डिएसपी दिपक खड्कालगायत पुगेका थिए ।
पक्राउ गर्ने क्रममा डिएसपी खड्काले नै अन्तिम इच्छा पूरा गर्न दिने भनेर बताएपछि विवाद भएको हो । कतै प्रहरीले पक्राउ गरेर ‘इन्कान्टर’ गर्न त खोजेको होइन भनेर रविका सहयोगीले उनीमाथि प्रश्न गरेका थिए ।
पछि खड्काले पक्राउ पर्नुअघि वकिलसँग सल्लाह गर्नेलगायत अन्तिम तयारीका लागि आफूले त्यसो बताएको भन्दै प्रष्टिकरण दिएका थिए । अहिले उनले अन्तिम इच्छाबारे सोधिएको भिडियो सामाजिक सञ्चालमा भाइरल छ ।
डिएसपी खड्काले त्यसो भनेपछि रविका सहयोगी प्रमोद न्यौपानेले समेत आपत्ति जनाएको भिडिओमा देख्न सकिन्छ । यसरी कहाँ के बोल्ने भन्नेबारे राम्रो ज्ञान नहुँदा प्रहरी बेला बेला विवादमा आउने गरेको छ । डिएसपी खड्का उसो त आफैंमा विवादित अधिकृत हुन् ।
स्कूप खबरबाट
