दाङ । तुलसीपुरमा पछिल्लो समय लोकप्रिय बन्दै गएको पर्यटकीय गन्तव्य तुलसीपुर–११ स्थित मोतिपुर बबई नदीमा सञ्चालनमा रहेको डुंगा सेवा तत्कालका लागि रोक लगाइएको छ।
जिल्ला प्रशासन कार्यालय, दाङले मंगलबार एक सूचना जारी गर्दै अवैध रूपमा सञ्चालनमा रहेको मोटरवोट सेवा आवश्यक प्रक्रिया पूरा नगरी सञ्चालन गरिएको भन्दै तत्काल बन्द गर्न आदेश दिएको हो।
प्रमुख जिल्ला अधिकारी कृष्णप्रसाद लम्सालद्वारा जारी सूचनामा पर्यटन विभागबाट प्रचलित कानुनअनुसार अनुमति नलिएर डुंगा सञ्चालन गरिएको स्पष्ट गरिएको छ।
यसअघि मौखिक रूपमा बन्द गर्न निर्देशन दिइए पनि अटेरी भएपछि लिखित सूचनामार्फत डुंगा सञ्चालनमा प्रतिबन्ध लगाइएको प्रशासनले जनाएको छ।
प्रशासनका अनुसार, डुंगा सञ्चालनका क्रममा नदी थुन्नु परेकाले स्थानीय किसानको सिँचाइमा समस्या उत्पन्न भएको छ भने नजिकै रहेको झोलुंगे पुलमा भीडभाडका कारण पुल नै जोखिममा परेको छ।
प्रशासनले स्थानीय प्रशासन ऐन २०२८ को दफा ६ (३)(क) अनुसार आफ्नो अधिकार प्रयोग गर्दै प्रक्रिया पूरा नगरेसम्मका लागि डुंगा सञ्चालनमा रोक लगाउने निर्णय गरेको हो।
प्रमुख जिल्ला अधिकारी लम्सालले सम्बन्धित डुंगा सञ्चालकहरूलाई आवश्यक कानुनी प्रक्रिया पूरा गरी मात्र सेवा सञ्चालन गर्न निर्देशन दिएका छन्।
