कैलाली । मोहन्याल ७, पितमारीमा नयाँ वर्ष २०८२ को अवसरमा पत्रकार मिलन तथा शुभकामना आदानप्रदान कार्यक्रम सम्पन्न भएको छ।
लम्कीचुहा प्रेस क्लबको आयोजनामा सम्पन्न उक्त कार्यक्रममा बाँके, बर्दिया र कैलालीका करिब ५० जना पत्रकारहरुको सहभागिता रहेको थियो। कार्यक्रमको संयोजन दीपक रावलले गर्नुभएको थियो भने सभाध्यक्षको भूमिका पनि उहाँले नै निर्वाह गर्नुभएको थियो।
कार्यक्रममा नेपाल पत्रकार महासंघका केन्द्रीय परिषद सदस्य लिलाजंग शाही प्रमुख अतिथि रहनु भएको थियो। विशिष्ट अतिथिमा केदार टुर एण्ड ट्राभल्सका प्रतिनिधि अर्जुन रावल, महासंघका प्रदेश सचिव इन्दु केसी, नेपाल प्रेस युनियनका केन्द्रीय सदस्य जमुना न्यौरे, प्रेस चौतारी नेपालका प्रदेश महासचिव भानुभक्त आचार्य, पत्रकार महासंघ कैलाली शाखाका सदस्य बिरेन्द्र शाह, र प्रेस सेन्टर नेपालका सागर चौधरीजस्ता विशिष्ट व्यक्तिहरुको उपस्थिति रहेको थियो।
कार्यक्रमका प्रमुख अतिथि शाहीले समसामयिक राजनीतिक अवस्थाबारे मन्तव्य राख्दै देशमा राजतन्त्र र गणतन्त्र पक्षधरबीचको आन्दोलनले अस्थिरता सिर्जना गरिरहेको बताउनुभयो। समाजमा दिगो शान्ति, सद्भाव र सुशासन स्थापनाका लागि सञ्चारकर्मीहरुले जिम्मेवार पत्रकारिता गर्नुपर्ने र सरकारलाई सचेत गराउने समाचार लेख्न आग्रह गर्नुभयो।
उहाँले २०४८ सालमा पूर्व माननीय गङ्गा बहादुर कुँवरद्वारा प्रस्तावित चिसापानी–जंगलघाट हुँदै मंगलसेन जोड्ने सडक अझै नबनेको विषयमा पनि ध्यानाकर्षण गराउँदै अछाम, दैलेख, जुम्ला, कालिकोट र सुर्खेत जाने छोटो दुरीको उक्त सडक निर्माणमा सरकारलाई दबाब दिन आग्रह गर्नुभयो।
कार्यक्रममा पत्रकार आशिष मल्ल ठकुरीले स्वागत मन्तव्य व्यक्त गर्नुभएको थियो भने सञ्चालन लम्की प्रेस क्लबका अध्यक्ष भुपेन्द्र विकले गर्नुभएको थियो।
कार्यक्रमको आर्थिक सहयोग केदार टुर एण्ड ट्राभल्सले गरेको हो।
