काठमाडौं । नेपाल प्रहरीले प्रहरी उपरीक्षक (एसपी)को सरुवा पुरानै मापदण्डअनुसार गर्ने तयारी गरेको छ। गृह मन्त्रालय र प्रहरी प्रधान कार्यालयबीच भएको छलफलपछि पुरानै मापदण्डलाई टेकेर सरुवा प्रक्रिया अघि बढाउने निर्णयमा पुगेका हुन्।
बिहीबार मात्र प्रहरी नायब उपरीक्षक (डिएसपी) र निरीक्षकहरूको सरुवा गरिएको भए पनि एसपी सरुवा भने अझै टुंगो लागेको छैन। तीन महिनाअघि नै हुनुपर्ने एसपी सरुवा राजनीतिक र आन्तरिक चलखेलका कारण ढिलाइ भएको स्रोतको दाबी छ।
हाल झापा, महोत्तरी, सर्लाही, रौतहट, रुपन्देही, कपिलवस्तु, बाँके, कैलाली, कञ्चनपुर, सुर्खेत, पाल्पा, काभ्रेपलाञ्चोक लगायतका एक दर्जन प्रमुख जिल्लामा एसपी सरुवाको तयारी भइरहेको छ। यी जिल्लाहरूमा एसपी बन्ने दौडधुप निकै तिव्र बनेको छ। अस्वस्थ प्रतिस्पर्धा र चलखेलले गर्दा अहिलेसम्म सरुवा निर्णय फाइनल हुन सकेको छैन।
यसैबीच, प्रहरी प्रधान कार्यालयले नयाँ मापदण्ड तयार पार्ने गृहकार्य पनि गरिरहेको छ। तर, हालको सरुवा पुरानै मापदण्डअनुसार हुनेछ र त्यसपछि मात्र नयाँ मापदण्ड कार्यान्वयनमा ल्याइने प्रहरी महानिरीक्षक (आईजीपी) दिपक थापाले मातहत अधिकारीहरूलाई जानकारी गराएका छन्।
यता, केही जिल्लाका एसपीहरूको कार्यसम्पादन सन्तोषजनक नदेखिएकाले उनीहरूलाई सात महिनामै फिर्ता बोलाउने तयारीसमेत गरिएको बताइएको छ।
सरुवा प्रक्रिया निष्पक्ष, पारदर्शी र कार्यसम्पादनमा आधारित होस् भन्ने आम नागरिक र प्रहरी वृत्तको अपेक्षा उच्च रहेको छ।
